Salmu.
53.
Ka ulahingen ni Dabid para te pangulu te mangngulahing ne eg-ulahingen iling te peg-ulahing te “Mahalat.” Migkahi diye te geyinawa ran ka egkengeungel, “Kene ne malehet ne due Manama.” Mareet ka eggimuwen dan, wey warad iya egkateu pad ne eggimu te meupiya. 
Migpamantew ka Manama diye te langit, wey impitew rin ka keet-etawan. Su egnengnengan din ke duen pad matagseb, wey ke duen naan pad migpamitew kandin. 
Migsuwey e ka langun te maheteng ne dalan; langun dan iya ne eggimu te mareet. Ware sabeka kandan ne eggimu te meupiya, minsan senge-etawan naan de iya. 
Ware kaligneepan te me etew ne mareet se hinimuwan. Mareet ka inggimu ran te keet-etawan ku. Ne kenad sikandan eg-ampu diye te Magbebaye. 
Piru egliyasen sikandan te mangune-kune, liyas ne ware dan de due naheram puun pad dengan, su egpayatpaten te Manama ka me tul‑an dan. Egkapeyilawan niyu sikandan tenged su in-engkeran e sikandan te Manama. 
Meupiya ke eggingume e ka talagluwas te Israil ne egpuun te Hirusalim. Emun ke igpalibed e man‑e te Magbebaye ka katubung te keet-etawan din, egkahale-gale si Hakub, wey egmahalew-galew si Israil.