Salmu.
57.
Ka ulahingen ni Dabid para te pangulu te mangngulahing. Insulat din seini te diye sikandin te sulung ka migpallahuy ki Saul. Eg-ulahingen seini iling te peg-ulahing te “Kene nu dereeti!” Ikeyid‑u a he Manama, ikeyid‑u a ubag su mig-aput a keykew, eyew egpangabangan a nikeykew. Eggeles a due te keykew iling te piyak ne eg-alupkupen te inayan, taman te egkapenge e ka makabayad-bayad ne kalasayan. 
Egpangumew a keykew te Amana ne Maresen ne Manama, ka Manama ne egtuman iya te igpeula-ula keddi. 
Egpabulihan a nikeykew puun te langit, piru egpeuyanan nu te samuk seeye se eglusud keddi. Igpapitew nu ka geyinawa nu ne kene egkabalbalawan, wey igpakita nu ne egkasalihan ka. 
Inlingutan a te me kuntere ne egpekeiling te mabbulut ne me liyun. Egpekeiling ka me ngipen dan te deldeg wey tunud, wey egpekeiling ka me dile dan te maggalang ne me kampilan. 
Ipapitew nu ka karesen nu diye te langit, wey ipakita nu ka katelesan nu te intiru ne kalibutan. 
Nalaggew a tenged su migtetangen ka me kuntere ku te igsahilut keddi, wey miglulungag sikandan diye te egbayaan ku, piru sikandan ded ka migsahad. 
Mapahetpet ka pusung ku ne egsalig keykew, he Manama. Egdayanen ku sikeykew te me ulahingen. 
Eg-enew a te maselem-selem wey egpangelit te alpa wey lira. Egpukawen ku ka maselem te ulahingen. 
Egpasalamatan ku sikeykew, he Magbebaye te minsan hendei ne me nasud, wey egdayanen ku sikeykew te me ulahingen diye te taliware te keet-etawan. 
Su egtuhun te langit ka geyinawa nu ne kene egkabalbalawan, wey egpekeuma te gapun ka pegkamatinumanen nu. 
Ipapitew nu ka karesen nu, he Manama diye te langit, wey ipakita nu ka katelesan nu te intiru ne kalibutan.