Salmu.
59.
Ka ulahingen ni Dabid para te pangulu te mangngulahing. Insulat seini ni Dabid te timpu ne impatamengan ni Saul te me sundalu ka baley rin eyew egkeyimatayan sikandin ni Saul. Eg-ulahingen seini iling te peg-ulahing te “Kene nu dereeti!” Luwasa a Manama ku puun te me etew ne egkuntere keddiey. Pangabangi a puun te me etew ne eg-ehet keddiey. 
Luwasa a puun te me etew ne mareet se eggimuwen, wey pangabangi a puun te mangngimatey. 
Pitew ka Magbebaye, eggepasan a nikandan eyew eggimatayan. Migliblibulung ka mabbulut ne me etew eyew eg-ehet keddiey, minsan ware mareet ne neyimu ku kandan. 
Migtaggel e sikandan wey mig-ayun e ka eglusud keddi, minsan ware mareet ne neyimu ku kandan. Weil kad Manama wey hendini kad ka egbulig keddi. 
Weil kad Amana ne Maresen ne Magbebaye, ka Manama te Israil. Paruseyi nud ka langun ne me nasud, wey kene ka keyid‑u te me etew ne eglilingu te me alukuy rin. 
Eglibed-libed sikandan tagse marusilem, wey egpekeiling te me asu ne egginihel wey eglingut-lingut te siyudad. 
Pammineg ka te igpangasak dan, wey mulmulii nu ka masakit ne iglalag dan. Kahi pad man‑e nikandan, “Ware egpakarineg kanta.” 
Piru egngisiyan nu re sikandan, he Magbebaye. Egbalbalayen nu sikandan Manama. 
He Manama, sikeykew ka kanekal ku wey ka eg-im-imanan ku, su sikeykew ma ka aputanan ku. 
Eggun‑a keddi ka Manama ku ne kene egkabalbalawan se geyinawa, wey igpapitew rin keddi ne egkatalu seeye se egkuntere keddiey. 
Kene nu dagdahawi te eggimatey sikandan, su kema ke mahaan egkalingew ka keet-etawan ku. Maresen ka wey pegsuwaya nu sikandan, wey taluwa nu sikandan Manama ne talagpangabang ney. 
Nakasale sikandan tenged te be‑be dan wey te maddeet ne impanlalag dan. Meupiya perem ke egsahad sikandan tenged te pegpaambug dan. Egpandilus sikandan wey eggelebek eg-uubat, 
sikan naa ka gulaa a nud sikandan. Dereeti nu sikandan tenged te langet nu, taman te egkaawe sikandan kayi te kalibutan. Ne egkanengnengan te me etew ne sikeykew Manama, ka mighari te kabuhalan ni Hakub wey te intiru ne kalibutan. 
Eglibed-libed sikandan tagse marusilem, wey egpekeiling te me asu ne egginihel wey eglingut-lingut te siyudad. 
Egleug-leug sikandan ka egpamitew te egkakeen, wey egpekeiling sikandan te me asu ne egginihel ke kene egkabulung. 
Eg-ulahingan ku sikeykew su maresen ka. Eg-ulahing a egpataman-taman tagse maselem, su ka geyinawa nu kene egkabalbalawan. Sikeykew ka aputanan ku wey ka talagpangabang ku, te timpu ne due igkabaybayari ku. 
He Manama, sikeykew ka kanekal ku. Eg-ulahingan ku sikeykew su sikeykew ka aputanan ku, wey sikeykew ka Manama ne kene egkabalbalawan se geyinawa keddiey.