Salmu.
60.
Ka ulahingen ni Dabid para te pegpanulu, para te pangulu te mangngulahing. Insulat din seini te migpakiggira sikandin te me matig-Aram-Naharaim wey te me matig-Aram-Suba, wey te nakalibed e si Huwab wey nekeyimatey te 12,000 ne me matig-Idum diye te bangalug ne egngaranan te Asin. Eg-ulahingen seini iling te peg-ulahing te “Liryu te Pangguhuren.” He Manama, in-ang-anggaan key e nikeykew wey imparereetan key nikeykew. Nabelu ka kanami, piru kuntee sagmana key red man‑e. 
Inwelwel nu ka tane wey impabekabeka nu. Piru upiani nu red seini su mahaan e egkatebal. 
Masumpit naan de iya ka impeula-ula nu te keet-etawan nu. Egpakatilistilis key e su hendue te impewubuhan key nikeykew te binu. 
Impanpanayan nu seeye se egtahud keykew, eyew egpakaalihu te karereetan. 
Luwasa key pinaahi te geem nu wey tabaka nu ka peg-ampu ney, eyew egkaluwas key se me pinalangge nu. 
Migkahi ka Manama diye te timplu nu, “Egpanalu a iya. Egbaaren ku ka Sikim wey ka napu te Sukut wey igbehey ku te me etew. 
Ka tane te Gilyad wey te Manasis, keddiey. Ka Ipraim ka talagpangabang ku, wey ka Huda ka tuked ku. 
Ka Muwab ka lu‑luanan ku te paa ku, wey ka inged ne Idum ka tahuanan ku te sandal ku. Egpanagyawan a ka egpanalu te me matig-Pilistiya.” 
Hentew‑a ka egpanulud keddi diye te siyudad ne in-alad te matikang wey makepal ne batu? Hentew‑a ka egduma keddi diye te siyudad te Idum? 
Sikeykew iya, he Manama ka mig-engked kanami, wey ware kad migduma te me sundalu ney. 
Bulihi key puun te me kuntere ney, su ware karuan te bulig te etew. 
Egpanalu key iya Manama ke egbulihan key nikeykew, su egkatalu nu iya ka me kuntere ney.