Salmu.
61.
Ka ulahingen ni Dabid para te pangulu te mangngulahing ne egbalesen te intagpesan ne me instrumintu. Pammineg ka te pegpangananey ku, he Manama, Linglingaa nu ka peg-ampu ku keykew. 
Egpangumew a keykew puun te katammanan te inged su egkaaldek a. Uyana a diye te inged ne egpakapariyu a te igkaaldek. 
Su sikeykew ka aputanan ku, iling te maresen ne alad ne eg-aputan ku te egkuntere keddi. 
Peugpaa a nikeykew diye te baley nu te intiru ne umul ku, alupkupa a iling te piyak ne eg-alupkupen te inayan. 
Su narineg nu, he Manama ka me saad ku, wey indasahan a nikeykew iling te pegbehey nu te karatuan te seeye se egtahud keykew. 
Timuli nu pa ka umul te Hari, eyew egmalayat pad ka peg-ugpe din, wey egpakakita pad te me kabuhalan din. 
Eghari perem sikandin te ware egtamanan ne kene egpakapariyu keykew. Tantanuri nu sikandin su ka geyinawa nu kene egkabalbalawan wey egkasalihan ka. 
Ne eg-ulahing a ka egdayan keykew, wey egtumanen ku ka insaad ku keykew tagse aldew.