Salmu.
73.
Ka ulahingen ni Asap. Malehet iya ne meupiya ka Manama te Israil, te seeye se malinis se me pusung. 
Piru meyitenged keddiey, hapit e egkaawe ka pegsalig ku; hapit e egkaawe ka pegpalintutuu ku. 
Su neimma a te me hambuhen, te pegkakita ku ne migmeupiya ka peg-ugpe te me makasesale. 
Ware sikandan mig-antus te me kasakitan; meupiya ka peglelawa ran wey manekal. 
Ware sikandan mig-antus iling te duma ne etew; ware sikandan neyirapi iling te nabayaan te duma. 
Purisu impapitew ran ka hambug dan iling te imbebalieg dan, wey ingkukumbale dan ka kabulut dan. 
Napenu ka me pusung dan te mareet, wey napenu ka me suman-suman dan te mareet ne eggimuwen. 
Inlemetan dan ka duma wey inlalahan dan te mareet; migpaambug sikandan ka egpanginaldek te duma. 
Miglalag sikandan te mareet meyitenged te Manama ne diye te langit, wey egpaambug ne egsuhu te me etew kayi te ampew te kalibutan. 
Purisu minsan ka keet-etawan te Manama migtahud e kandan, wey egpalintutuuwan ka langun ne iglalag dan. 
Ne egkahi sikandan, “Mania te egpakanengneng ka Manama? Due katuenan te Maresen ne Manama?” 
Iling due ka me etew ne mareet se hinimuwan, ware igkalaggew wey migmemayaman sikandan. 
Purisu ware karuan ke egmalinisen ku ka pusung ku, wey ware karuan ke egpakannekal a ne kene egkabiluwan ka me belad ku. 
Su malasi a nikeykew paantusa, Manama; imbaybayaran a nikeykew tagse maselem. 
Ke nakalalag e ma te iling te inlalag te me etew ne mareet se hinimuwan, egkaakalan kud e perem ka me anak nu. 
Piru mig-el-elehan ku te egsabut ke mania te egmemayaman ka me etew ne mareet se hinimuwan, piru amana seini ne malised ne egsabuten. 
Nataman, miggendiya ad e te timplu te Manama, ne henduen ku pad nasabut ke nekey ka egkatamanan dan. 
Ka malehet, diye nu sikandan itahu te malurek ne dalan, wey igpeendiye nu sikandan te karereetan. 
Mahaan egkareeti sikandan, wey egpamatey sikandan te makaaldek-haldek ne egkatamanan. 
Egpekeiling sikandan te taheinep ne egkaawe de te pegkamaselem; te peggimata nu, Magbebaye, egkalaag e sikandan. 
Te timpu ne nasakitan ka pusung ku, wey neenhenduenan a, 
nekeiling te ungel a wey wara a nakasabut; nekeiling a te mananap diye te tangkaan nu. 
Piru minsan pad due, duma a nikeykew layun, wey inggen-genan nu ka kawanan ne belad ku. 
Mig-inahak a nikeykew pinaahi te tambag nu, te katammanan, eg-uyanen a nikeykew diye te meupiya ne peg-ugpe. 
Warad e duma due te langit ne egsalihan ku, ke kene, sikeykew re! Ne warad e duma ne igkeupii ku kayi te ampew te tane, ke kene, sikeykew naan de iya. 
Minsan egmahuye ka lawa ku wey ka pusung ku, piru ka Manama ka kanekal ku, wey ka keilangan ku te ware egtamanan. 
Seeye se egpariyu keykew, egkengatarin, wey egdereetan nu ka langun ne kene egmatinumanen keykew. 
Piru meyitenged keddiey, meupiya ke egparani a te Manama. Inggimu ku ka Maresen ne Magbebaye ne helesanan ku, wey igpangguhud ku te minsan hentew ka meupiya ne inggimu nu.