Salmu.
74.
Ka ulahingen ni Asap. Manama, mania te in-ang-anggaan key en iya nikeykew te malehet? Mania te nabelu ka te keet-etawan ne egtangguwen nu? 
Manama, tantanuri nu red ka keet-etawan nu ne in-alam nu dengan, wey inluwas nu eyew eggimuwen nu ne keet-etawan. Tantanuri nu ka Bubungan ne Siyun ne ugpaan nu. 
Paralan-dalan ka wey pitawa nu ka timplu, ne egkaparahas-dahasan te egkahuhus. Ingguhus te me kuntere ney ka langun, ne diye te timplu nu. 
Migmanguleyi ka me kuntere nu, diye te elat-elat te timplu nu. Migpanahu sikandan te me bendila dan diye, eyew te pegpanengneng ne migpanalu sikandan. 
Egpanlusud sikandan iling te me etew ne egpamuwalas, ne egkubayan te wasey ka egpameled te me kayu. 
Ingguhus dan te wasey wey buntuk, ka impangawakan ne me kayu diye te timplu. 
Insilaban dan ka timplu nu wey indereetan, imbaley-baley ran ka ugpaan nu. 
Migkahi sikandan diye te geyinawa ran, “Egguleen key nikandan eg-am-amina.” Intutung dan ka langun ne egsimbaan ney keykew, te minsan hendei kayi te inged te Israil. 
Warad me kein-inuwan ne palinneu ne egkakita ney, wey warad degma me prupita ney, wey ware key nakanengneng ke ken‑u egkataman ka egkeula-ula ney. 
He Manama ken‑u egkataman ka pegbaley-baley keykew te me kuntere ney? Egparahas-dahas naa sikandan ne egpeyilew keykew taman keureme? 
Mania te migpepegnel ka wey ware nu sikandan duseyi? Kawkawanan ka wey dereeti nud sikandan. 
Sikeykew Manama, Hari kad en iya mule minsan dengan, wey kamasulug kad migluwas te me etew te kalibutan. 
Imbaad nu ka dahat tenged su maresen ka, wey inlupet nu ka me ulu te derakel ne me mananap diye te dahat. 
Sikeykew ka miglupet te me ulu te salimbaweng, wey impakeen nu ka lawa ran te me mahintalunan diye te disirtu. 
Impatulayas nu ka me sebseb wey ka me beuhan. In-etiyan nu ka derakel ne me weyig. 
Sikeykew ka miggimu te maaldew wey marusilem. Sikeykew ka migteil ke hendei nakatahu ka bulan wey ka aldew. 
Sikeykew ka miggimu te langun ne patamanan te kalibutan, wey sikeykew ka miggimu te tingmeinit wey tingmaagsil. 
He Manama, sumsumana nu ke immenu ka te egbaley-baley te me kuntere nu, wey immenu ka te egpeyilew te egkengeungel ne me etew. 
Kene nu ibehey ka keet-etawan nu diye te me kuntere dan, su egpekeiling sikandan te me selepati ne igsunggud te me mabbulut ne me mahintalunan. 
Tantanuri nu ka kasabutan nu kanami, tenged su mig-ingeran te maddeet ka marusilem ne baad te kalibutan. 
Kene nu balahara ne egkeyilawan ka egkaleig-leig. Egdayanen ka perem te egkaayu-ayu wey ware egkeyimu. 
Weil kad Manama wey pakabbulut kad. Sumsumana nu ne eggelebekan ka te egbaley-baley te egkengeungel. 
Kene nu kalingawi ka peglelalis te me kuntere nu, wey ka pegpanagyawan te pegbebantak dan keykew layun.