Salmu.
75.
Ka ulahingen ni Asap para te pangulu te mangngulahing ne eg-ulahingen iling te peg-ulahing te “Kene nu dereeti.” He Manama, egpasalamat key keykew. Egpasalamat key keykew su marani ka kanami. Ne impangguhud te me etew ka kein-inuwan ne me himu nu. 
Migkahi ka Manama, “Migkekerew ad e ke ken‑u a eggukum, wey ware eglapihan ku te peggukum ku. 
Emun ke egkawelwel ka kalibutan wey egpangelkelen e te liyas ka nangugpe, sikeddiey ka eggiresen te me pabunsuran te kalibutan eyew kene egkaweil. 
Insaparan ku ka me hambuhen ne kene egpaambug, wey innangenan ku ka me etew ne mareet se hinimuwan te kene egpeggasal. 
Insaparan ku sikandan ne kene egpaambug ka eglalag, wey kene man‑e egpegpeggasal te katuenan dan.” 
Su ka kabantug te etew kene egpuun diye te igsile wey ke iglineb, kene man‑e seini egpuun diye te disirtu, 
su diye de egpuun te Manama ne talaggukum. Sikandin ka egpabantug te sabeka ne etew, wey sikandin ded degma ka egpariralem te duma. 
Su miggen-gen sikandin te ubab ne napenu te binu, ne iyam wey amana ne masakit. Ne igbusbus din seini diye te inged, wey egpekeinum ka langun ne me etew, taman te egkaamin e egtihis ka diye te ubab wey warad egkasame. 
Piru kena a egpeeneng-eneng ka egpangguhud meyitenged keykew. Manama ni Hakub, egdayanen ku sikeykew te me ulahingen. 
Egkaawe ka katuenan te me etew ne mareet se hinimuwan, piru egkatimulan ka katuenan te me matareng.