Salmu.
77.
Ka ulahingen ni Asap para te pangulu te mangngulahing ne si Hidutun. Migpanguleyi a ka egpangananey te Manama, wey egpamminehen a nikandin. 
Te timpu ne egkabaybayaran a, egpammitew a te Manama. Minsan te marusilem, kena a egkapu-pu ka egkayew te belad ku, wey ware egpakaliwang keddi eyew egmeupiya ka geyinawa ku. 
Ke egkasuman-suman ku ka Manama ne egpakapanlagkuy a. Ke egpalemlem a kandin ne egmasakit ka geyinawa ku. 
Wara a nikandin paliperenga. Kena a egpakalalag su egkabantalan a. 
Insuman-suman ku ka me aldew ne nanlihad, wey ka me leg‑un dengan. 
Egkapawaan e re due ka egsuman-suman te ulahingen ne in-ulahing ku. Migpalemlem a wey nekeinsa a te pegkeetew ku, 
“Eg-ang-anggaan e buwad te Magbebaye? Kene e buwad iya igkeyid‑u nikandin? 
Nataman bu naan e ka geyinawa rin keddi ne kene egkabalbalawan? Eglingawan din buwad iya ka insaad din? 
Nalingew buwad sikandin te hiid‑uwen sikandin? Kene buwad sikandin egkeyid‑u su nabelu sikandin?” 
Ne migkahi a, “Seinid iya ka kulis ku: migkuntere e keddiey ka kawanan ne belad te Amana ne Maresen ne Manama.” 
Egtantanuran ku ka me himu nu Magbebaye. Uya, egtantanuran ku ka me kein-inuwan ne nangimu nu dengan. 
Egpalemlemen ku ka langun ne nangimu nu, wey egsumsumanen ku ka kein-inuwan ne me himu nu. 
Ka keykew ne suman-suman Manama, kene egpekeiling te duma. Ware manama ne iling keykew te maresen ne Manama ney. 
Sikeykew ka Manama ne egpekeyimu te me kein-inuwan. Impapitew nu ka karesen nu te me keet-etawan. 
Inluwas nu ka keet-etawan nu su maresen ka; inluwas nu ka me kabuhalan ni Hakub wey ni Husi. 
Egpangelkelen ka pused te dahat ke egpakakita keykew, iling te etew ne egpangelkelen ke egkaliyasan! 
Eglugsu ka uran puun te egmangikibel, wey migdagsang ka luhung diye te langit, wey miggeteb ka kilat te minsan hendei. 
Migdagsang ka luhung ne egpakaruma te egbalisusu ne kalamag, wey migmalayag ka inged tenged te dakel ne kilat, wey nawelwel ka intiru ne kalibutan. 
Miglapas ka te dahat wey migbaye diye te elat te migpahamayan ne weyig, ne ware nakita ka kemes nu. 
In-inahak nu ka keet-etawan nu iling te me karniru, wey iyan nu impepangulu kandan si Muwisis wey si Aarun.