Salmu.
78.
Ka ulahingen ni Asap. Pammineg kew me karumaan ku ne kabuhalan ni Israil. Nengneng kew te iglalag ku kuntee. 
Egpangguhud a kaniyu te panunggilingan, wey egnangenan ku sikaniyu meyitenged te maddalem ne epad te kabuybuyahan, 
ne narineg tad wey nanengnengan, uya su impangguhuran ki te kaap-apuan ta. 
Kene tad iggeles te me anak ta, wey igpangguhud tad te me kabuhalan ta, ka nakabantug te Magbebaye ne himu rin, wey ka karesen wey kein-inuwan ne nangimu te Manama. 
Miggimu sikandin te kasabutan ki Hakub, wey imbehayan din te balaud ka me kabuhalan ni Israil. Imbanasalan din ka me kabuybuyahan ta, ne igpanulu seini te me kabuhalan dan, 
eyew egkanengnengan degma seini te me anak dan keureme, wey igpakapanulu dan degma te me kabuhalan dan. 
Puun due, iyan dan de egpallatengen ka Manama, wey kene dan egkalingawan ka nangimu te Manama, wey egtumanen dan ka me suhu din. 
Kene sikandan egpekeiling te kabuybuyahan dan, ne makehal se ulu wey masinupaken te Manama. Kene ne manekal ka pegsalig dan te Manama, wey kene egkasalihan te Manama. 
Ka me kabuhalan ni Ipraim, naatul te pane, piru namallahuy sikandan te due egpahiggireey. 
Ware dan tumana ka kasabutan dan te Manama. Ware dan ikula ka balaud. 
Ware dan e tantanuri ka nangimu rin dengan, wey inlingawan dan e ka me kein-inuwan ne impakita rin kandan. 
Miggimu te me kein-inuwan ka Manama diye te Suwan, diye te Ihiptu, wey nakita te me kabuybuyahan ta seini langun. 
Imbaad din ka dahat wey impalapas din sikandan diye te elat. Impakehal din ka weyig iling te nekeglimang ne dalama. 
Te maaldew, intuusan din sikandan te gapun te peggipanew ran, te marusilem, egkalegleg ne hapuy ka igteng‑ew rin kandan. 
Impabekabeka rin ka me batu diye te disirtu, wey migtulayas ka weyig ne hendue te diye migpuun te diralem te tane, wey impeinum din sikandan te weyig. 
Impatulayas din puun te batu ka weyig, ne egpekeiling e te pagpahamayan ne weyig. 
Piru nanasnasian de iya sikandan miggimu te sale diye te disirtu, wey migsupak sikandan te Amana ne Maresen ne Manama. 
Migleglehetan dan te eg-eleg-eleg ka Manama, su imbuyuan dan sikandin te igkeibeg dan ne egkakeen. 
Indali-dian dan ka Manama te migkahi, “Duen naa egkakeen ne igpakasendad te Manama kanta kayi te disirtu? 
Malehet ne imbarasan din ka batu, wey migtulayas ka weyig wey migduu. Piru egpakabehey naa degma sikandin te egkakeen? Egpakapakeen naa sikandin te ngalap te keet-etawan din?” 
Purisu nangebel-ebel ka langet te Magbebaye, te narineg din ka inlalag dan. Nabelu-belu amana sikandin te me anak ni Hakub, wey nalanglangetan sikandin te kabuhalan ni Israil, 
su ware pegpalintutuu ran kandin, wey ware migsalig te karesen din te pegluwas kandan. 
Piru imbanasalan din ded man‑e ka langit, eyew egkalukatan ka me gumawan diye, 
wey in-uluhan din sikandan te egkakeen ne manna, ne egpekeiling te eglugsu ne uran eyew due egkakeen dan. 
Migkeen sikandan langun te egkakeen te me panalihan. Impeuyanan sikandan te Manama te dakel ne egkakeen. 
Impakalamahan te Manama ka aw-awangan puun te igsile, wey impalayap din ka kalamag puun te iglineb. 
Impeuyanan din sikandan te ngalap iling te alinepung ne egkabusbus puun te langit. Impeuralan din sikandan te me bayaku iling kasulug te pantad te dahat. 
Impalene din ka me bayaku diye te elat te kampu ran, wey nekeempet de iya diye te inleleeban dan. 
Purisu nangeen sikandan wey nabbulung-bulung, su imbehey te Manama ka igkeibeg dan te egkeen. 
Piru ware sikandan neurali te igkeibeg dan, su egpangeen pad iya man‑e sikandan, 
ne nabelu e ka Manama kandan. Impangimatayan din ka subla ne manekal ne me etew, wey ka me kanakan diye te Israil. 
Piru ware iya man‑e sikandan nareha, wey miggimu red te sale diye te Manama. Minsan nakita ran e ka kein-inuwan ne inggimu rin, ware iya man‑e sikandan migpalintutuu kandin. 
Purisu in-epus din e ka umul ran iling te geyinawa ne egkaawe, wey neelin ne masumpit ka egkeula-ula ran te pila ne leg‑un ne peg-ugpe. 
Te nangimatayan din e sikandan, migparani e sikandan te Manama. Mig-inniyug e sikandan te me sale dan, wey mig-aput te Manama. 
Nasuman-suman dan ne aputanan dan bes ka Manama, wey talagluwas dan ka Amana ne Maresen ne Manama. 
Piru taman de iya sikandan te lalag, wey ubat ka impangguhud dan. 
Kene sikandan ne matinumanen te Manama, wey ware dan tumana ka kasabutan dan te Manama. 
Piru ka Manama hiimenawen, wey in-awe din ka me sale dan, wey ware din ded dereeti sikandan. Kamasulug din pegnela ka belu din, wey ware din parumdumeyi ka langet din. 
Nasuman-suman din ne me etew re sikandan, egpekeiling de sikandan te kalamag ne eglihad de. 
Kenad egkaseel ka pegsupak dan te Manama diye te disirtu, wey impasakitan dan sikandin te seeye ne inged. 
Layun dan de eg-el-elehi ka Manama, wey impasagkilan dan ka Matulus ne Manama te Israil. 
Inlingawan dan e ka pegpangabang kandan te Manama dengan, te timpu ne inluwas din sikandan te me kuntere dan. 
Nalingawan dan e ka kein-inuwan ne nangimu rin diye te Ihiptu, wey ka me palinneu ne nangimu rin diye te tane te Suwan. 
Impabaluy rin ne langesa ka me weyig, wey kenad egpekeinum ka me etew te me beuhan. 
Impewulunan din sikandan te me lengew-lengew, wey miggulanap degma ka me bakbak ne migdereet kandan. 
Impakeen din te me palahe ka me pinamula ran, wey impaamin din te me talangas ka nahaani ran. 
Indereetan din te apiyew ka me parasan dan, wey inlagkes din degma ka me kayu ne sikumuru. 
Indereetan din man‑e te apiyew ka me baka ran, wey imparagsangan din te kilat ka me ayam dan. 
Impaneem-neem din kandan ka egpangebel-ebel ne langet din, wey impabayaan din te me panalihan ne me talagdereet, su amana sikandin nabelu-belu wey neubil kandan. 
Impapitew rin iya ne nabelu-belu sikandin, wey ware din sikandan pangabangi ne eyew kene egpatey, ke kene, nasi din de iya sikandan ipasalerep te karereetan, wey naamin-amin sikandan nahule. 
Impangimatayan din ka langun ne kinakakayan te me matig-Ihiptu, seeye se igkasalig te me kabuhalan ni Ham diye te ugpaan dan. 
Ne impaawe din te Ihiptu ka keet-etawan din, iling te impaawe ne me karniru. Ne indumaan din sikandan diye te disirtu, iling te in-inahak ne me ayam. 
Indumaan din sikandan, purisu ware sikandan naaldek. Piru nalened mule te dahat ka me kuntere dan. 
In-uyan din sikandan diye te inged din ne matulus, diye te tane ne naahew rin. 
Indeldel rin ka me mahinged pariyu te keet-etawan din, wey imbaad-baad din ka tane diye te tribu te Israil, wey impeugpe din sikandan diye. 
Piru mig-el-elehan dan ka Amana ne Maresen ne Manama, wey ware sikandan migtuman te me suhu din. 
Migsuwey sikandan kandin wey mig-akalan dan sikandin, iling te inggimu te me kabuybuyahan dan dengan. Kene sikandan egkasalihan iling te pane ne mareet. 
Miggimu sikandan te me panubaran diye te me bubungan, eyew egkabelu ka Manama kandan. Migsimba sikandan te ingkulit dan ne me larawan, eyew egpangalikud sikandin kandan. 
Nanengnengan seini te Manama wey nabelu sikandin. Purisu in-engkeran din e ka me kabuhalan ni Israil. 
In-engkeran din e ka ugpaan din diye te Silu, seeye ka ugpaan din te miglemung te me etew. 
Impaahew rin te me kuntere ka Tahuanan te Kasabutan, ka tuus te kandin ne karesen wey katelesan. 
Impeyimatayan din ka keet-etawan din, su nabelu sikandin kandan te in-alam din. 
Newugmas te hapuy ka me kanakan, wey warad egpakaasawa te me mengebay. 
Ne nammatey ka me talagpanubad te pegpahiggireey, piru kene egkaayun ne egpakaramag kandan ka me asawa ran ne nenabalu. 
Ne hendue te naalimukawan ka Magbebaye, egpekeiling sikandin te manekal ne etew ne migmabulut tenged te inumen. 
Nenakapallahuy ka me kuntere din ne indula rin, impeyilawan din sikandan te ware egtamanan. 
Insamsamilian din e ka me kabuhalan ni Husi, ware din e sikandan alama se me kabuhalan ni Ipraim. 
Piru iyan din in-alam ka me kabuhalan ni Huda, wey ka Bubungan ne Siyun ne indakelan din te geyinawa. 
Impasasindeg din ka ugpaan din iling katikang te langit, wey iling karesen te tane ne kene egkaweil. 
In-alam din si Dabid ne suluhuanen din, in-angey rin sikandin ka talagbantey te me karniru. 
In-angey rin sikandin ka egsinsinundul te talanati ne karniru, wey impepangulu rin te kabuhalan ni Hakub, ka in-alam din ne keet-etawan te Israil. 
Inleglehetan din sikandan te egtanggu, wey impaay-ayaran din sikandan te egpangulu.