Salmu.
82.
Ka ulahingen ni Asap. Migpinnuu e ka Manama ne egtambung te kalibulunganan te maddesen. Migpangulu sikandin kandan ka eggukum. 
Migkahi sikandin, “Ken‑u kew egkataman ka eggukum te kene ne eleg? Ken‑u egkataman ka peglapig niyu te me etew ne mareet se hinimuwan? 
Keilangan ne eleg ka peggukum niyu te egkaleig-leig wey me ilu. Pangabangi niyu ka katenged te egkabaybayaran wey egkaayu-ayu. 
Pangabangi niyu ka egkaleig-leig wey ka egkaayu-ayu. Bulihi niyu sikandan puun te belad te me etew ne mareet se hinimuwan. 
Ware katuenan dan wey kene egpakasabut, wey egkaleug-leug sikandan te marusilem, taheed te egkawelwel ka pabunsuran te tane. 
Kahiyen ku ne me manama kew. Me anak kew langun te Amana ne Maresen ne Manama. 
Piru egpatey kew red iling te duma ne me etew. Egkapeled kew red degma iling te duma ne me pangulu.” 
Sasindeg ka, he Manama wey hukumi nu ka kalibutan, su sikeykew ka kamuney te langun ne me nasud.