Salmu.
88.
Ka ulahingen te me kabuhalan ni Kura para te pangulu te mangngulahing. Eg-ulahingen seini iling te peg-ulahing te “Mahalat Linut,” ka ulahingen ni Hirman ne kabuhalan ni Isra. He Magbebaye ne talagluwas keddi ne Manama, egpangananey a layun keykew tagse aldew wey tagse marusilem. 
Egpekeuma red ubag perem diye te keykew ka peg-ampu ku, wey egpamminehen a nikeykew te igpangananey ku keykew. 
Su masumpit ne egkasamuk ka geyinawa ku, wey egpakarani-rani ad te inged te me minatey. 
Inlagkes ad e nikandan te egseel te neulug e diye te lungag, wey warad kanekal ku, 
iling te nakasewug e te me minatey, wey nekeiling e te nekeyibat diye te lebeng. Nekeiling ad te seeye se kenad egkasuman-suman, su nakasuwey e sikandan te duma. 
Intahu a nikeykew diye te kinariraleman te lungag, diye te subla ne marusilem ne lungag. 
Nabehatan a te langet nu ne hendue te nakapisel keddi, wey ingginalatan a nikeykew te masumpit ne me bunlud nu. 
Impitas a nikeykew te me duma ku, wey egkaalatan e sikandan keddiey. Ingkulung a eyew kena a egpakapallahuy. 
Kena ad e egpakameleg-meleg su layun e re eglungku. Tagse aldew ne egpangananey a keykew Magbebaye. Igtinawe ku ka belad ku keykew Manama. 
Eggimuwan nu naa ka me minatey te kein-inuwan? Egpekeenew naan pad sikandan eyew egdayanen ka? 
Egkaayun naan pad ne igpanengneng ka geyinawa nu ne kene egkabalbalawan diye te lebeng? Igpakapataha naan pad diye te inged te me minatey ne egkasalihan ka? 
Nakita naan pad ka kein-inuwan ne himu nu diye te marusilem? Egkasuman-suman naan pad ka meupiya ne nangimu nu diye te inged ne inlingawan e? 
Piru egpangumew a mule keykew Magbebaye, eg-ampu a te maselem diye te keykew. 
He Magbebaye, mania a te egdeldelen nu ka gimukud ku? Mania te eggelesan a nikeykew? 
Egkabaybayaran a wey egpatey ad e perem, puun pad te bate e pad. In-antus ku ka pegginalat nu keddi, wey kena ad e egpekeeleg. 
Inlampesan a nikeykew su nalangetan ka, nareetan a te makaalat-halat ne peglusud nu. 
Nekeiling a te nalingutan te dakel ne baggiyu te naapunan. Nakulung ad nikandan wey warad egkabayaan. 
Impitas nu keddi ka inggeyinawaan ku wey ka alukuy ku. Nekeiling naan de te iyan ku egkaruma-ruma layun ka delem.