Salmu.
91.
Seeye se eg-ugpe diye te ugpaan te Amana ne mabantug ne Maresen ne Manama, egkaralungan iya te karesen te Magbebaye ne Manama. 
Egkahiyan ku ka Magbebaye, “Sikeykew ka talagpangabang wey aputanan ku, wey sikeykew ka migsalihan ku Manama ku.” 
Su egluwasen ka te Manama puun te igsahilut te minsan hentew, wey egpangabangan ka puun te egpakapatey ne me dalu. 
Eg-alupkupen ka nikandin iling te banug ne due pakpak, wey eg-akelupen ka nikandin eyew egpangabangan. Te pegkamatinumanen din, egtamengan ka nikandin wey egpangabangan. 
Kene ka kaaldek te makaliyas-liyas ne delem, wey kene ka kaliyasi te me tunud ne egmakatandeg te maaldew. 
Kene ka kaalati te me dalu ne egtigkew egduma te karusileman, wey kene ka kaaldek te karereetan te egpekeuntud ka aldew. 
Egkahule ka senge-libu ne me etew diye te lenged nu, wey sapulu ne libu red degma ka diye te igkakawanan nu, piru kene seini egpekeuma diye te keykew. 
Mata-mata nud iya te egpipitew, wey egkakita nu ke egmenuwen te egdusa ka me etew ne mareet se hinimuwan. 
Uya su ka Magbebaye ka aputanan nu, ka Amana ne Maresen ne Manama iya ka talagtameng ku. 
Ware mareet ne egginguma keykew, ware karereetan ne egginguma te baley nu. 
Su egsuhuen din ka me panalihan din ne egbantey keykew, wey egpabantayan ka minsan hendei ka egbaye. 
Egtapayeen ka nikandan te me belad dan, eyew kene egpakabaras te batu ka paa nu. 
Egpandi-diekan nu ka me liyun wey ka me mammiley, egpanlentayan nu ka me anak te liyun wey ka me uled. 
Migkahi ka Manama, “Egluwasen ku sikeykew se miggeyinawa keddiey. Egpangabangan ku sikeykew se mig-ila te ngaran ku. 
Ke egpangumew ka keddi, egtabaken ku sikeykew. Egdumaan ku sikeykew te timpu te samuk, egluwasen ku sikeykew wey igpabantug ku. 
Egbehayan ku sikeykew te malayat ne umul, igpapitew ku keykew ne egluwasen ku sikeykew.”