Salmu.
94.
He Magbebaye, Manama ka ne eglegpad iya; ipakita nud ka pegsuli nu para kanami, Manama! 
Sikeykew ka talaggukum kanami langun; purisu sagman kad wey legpari nud ka me hambuhen te eleg kandan! 
Ken‑u pad taman ne egkahale-gale ka me etew ne mareet se hinimuwan? Ken‑u pad taman, he Magbebaye? 
Ken‑u pad taman ka me makasesale ne egpaambug, wey egpeggasal te me sale dan? 
Impanleig-leig dan ka keet-etawan nu, he Magbebaye, wey imbaybayaran dan ka in-alam nu ne me etew. 
Impangimatayan dan ka me balu ne me malitan wey ka me ilu, lagkes ka me lapu ne mig-ugpe te inged ney. 
Ne migkahi sikandan, “Ware ki kitaa te Magbebaye; ware ki sumsumana te Manama te Israil.” 
Egpamusawen kew wey kene kew egmanulik! Ken‑u kew bu pad egmemakasabut? 
Inggimu te Manama ka me talinga ta—kene naa iya sikandin egpakarineg? Inggimu rin ka mata ta—kene naa iya sikandin egpakakita? 
Egdisiplineen din ka me nasud—kene din naa iya eglegparan sikandan? Egpanuluen din ka langun ne etew—ware naa iya katuenan din? 
Nakataha ka Magbebaye te egsumsumanen ta; nakataha sikandin ne ware me karuan te egmanumsumanen ta. 
Keupianan te etew ne indisiplina nu, he Magbebaye, ka etew ne impanulu nu te balaud nu! 
Impeyimeley nu sikandin te me timpu te samuk taman te egdereetan nud ka me etew ne mareet se hinimuwan. 
Tenged su kene nu eg-engkeran, he Magbebaye, ka keet-etawan nu; kene nu iya egbalaharen ka me etew ne in-alam nu. 
Te kene egkaluhey, eg-ikul ded man‑e eggukum ka me talewukum ke nekey ka eleg, wey egkengaggale ka langun ne matareng. 
Hentew naan de iya ka egpangabang keddiey puun te me etew ne mareet se hinimuwan? Hentew naan de iya ka egbulig keddiey puun te me makasesale? 
Emun ke wara a bulihi nikeykew, Magbebaye ne Manama, nakalemung buwad perem ka gimukud ku te inged te me minatey. 
Ne emun ke egpakasuman-suman a ne egpatey ad e, imbulihan a nikeykew, he Magbebaye, duma te geyinawa nu ne kene egkabalbalawan. 
Emun ke egkalaggew a wey egkalange a, egliwangen a iya nikeykew. 
Ware labet nu te maddeet ne me talewukum, ne eggimu te supak te balaud. 
Migplanu sikandan te mareet meyitenged te matareng ne me etew, wey impangimatayan dan ka ware me sale. 
Piru sikeykew se Magbebaye ne Manama ku, ka talagpangabang ku, wey ka batu ne aputanan ku. 
Eglegparan nu sikandan tenged te maddeet ne me himu ran, wey egdereetan nu sikandan tenged te me sale dan; egdereetan nu iya sikandan, Magbebaye ne Manama ney.