Salmu.
97.
Eghari ka Magbebaye, egkahale ka kalibutan. Egkahale ka masulug ne me pulu diye te dahat. 
Nalingutan sikandin te gapun wey delem. Nakapabunsud ka peghari din due te katareng wey eleg ne peggukum. 
Eggun‑a kandin ka hapuy, ne egtutung te langun ne egkuntere kandin ne nakalingut kandin. 
Eglayahan te kilat din ka kalibutan, ne egkakita seini te intiru ne kalibutan wey egpangelkelen sikandan te liyas. 
Ka me bubungan iling te kendila ne egkaleney, egkewugnak seini diye te tangkaan te Magbebaye te intiru ne kalibutan. 
Impataha te langit ka pegkamatareng din, ne nakita te langun ne me etew ka katelesan din. 
Egpeyilawan seeye se egsimba te me larawan, wey seeye se egpegpeggasal te ware karuan ne me diyus-diyus. Ka langun ne maddesen, eg-usengul diye te tangkaan te Manama. 
Ne nahale ka me matig-Hirusalim ne nakarineg, miggale-gale ka me matig-Huda tenged te peggukum nu, he Manama. 
Su subla ka ne maresen te langun kayi te intiru ne kalibutan. Subla ka pegdayan keykew du te pegdayan te me maddesen. 
Sikaniyu se miggeyinawa te Magbebaye, ikeepes niyu ka mareet. Impangabangan din ka keet-etawan din, ne kene egkareetan ka umul ran, inluwas din sikandan puun te me etew ne mareet se hinimuwan. 
Ka layag, miglayag eyew te keupianan te me matareng, wey kahalaan te seeye se malinis se pusung. 
Kahale kew due te Magbebaye, sikaniyu se me matareng, ne pasalamat kew te matulus ne ngaran din.