Salmu.
99.
Eghari ka Magbebaye ne Manama, ne egpangelkelen ka me etew. Migpinnuu sikandin te trunu ne nekeuntud te me kirubin, wey egkawelwel ka inged. 
Maresen ka Magbebaye diye te Hirusalim; egdayanen sikandin te langun ne me etew. 
Egsayeen dan ka mabantug wey kein-inuwan ne ngaran din. Matulus sikandin. 
Manekal ka Hari wey inggeyinawaan din ka eleg ne peggukum. Eleg ka gantangan wey palabian te peggukum din, wey impapitew rin ka pegkamatareng din te me kabuhalan ni Israil. 
Dayana niyu ka Magbebaye ne Manama ta. Simba kew diye te tangkaan te trunu rin. Matulus sikandin. 
Nakalagkes si Muwisis wey si Aarun te me talagpanubad din. Ne si Samwil degma ka duma te seeye se mig-umew te ngaran te Magbebaye. Migpangumew sikandan te Magbebaye, wey intabak din sikandan. 
Migpakiglalag sikandin kandan puun te gapun ne egpekeiling te sungkaleg. Intantanuran dan ka malehet ne me panulu din. 
Intabak nu sikandan Magbebaye ne Manama ney. Sikeykew ka Manama ne migpasaylu kandan, piru migsulian nu sikandan te mareet ne inggimu ran. 
Dayana niyu ka Magbebaye ne Manama ta. Egsimbeen sikandin diye te matulus ne bubungan din, su matulus ka Magbebaye ne Manama ta.