Salmu.
102.
Ka peg-ampu te nabeley e ne egkabaybayaran, wey migsagsahukul e diye te Manama. Pammineha nu ka peg-ampu ku Magbebaye; egkarineg nu perem ka pegpangananey ku keykew. 
Kene ka geles keddi te aldew ne egkabaybayaran a. Panallinga ka keddi wey dagdahawi a te egtabak te aldew ne egpangumew a. 
Mahaan e egkataman ka peg-ugpe ku, iling te ebel ne eglayap de. Egpekeiling e te baha ka lawa ku ne egmeinit. 
Nekeiling ad te nareetan wey nahangu ne hilamunen, egkalingew ad ne egkeen. 
Egpakareg-uy ad te meemen, ne egmanleput e ka tul‑an ku. 
Nekeiling ad te nakasabsabeka ne banug diye te disirtu, wey nekeiling ad te ekang diye te inged ne nahuhus wey in-engkeran. 
Kena a egkewulep ke eglipereng a. Nekeiling a te bayaku ne nakasabsabeka ne miglatun diye te atep te baley. 
Egkaapunan de ka me kuntere ku ne egdali-di keddi; seeye se egsusumpalit keddi, igpandilus dan e ka ngaran ku. 
Iyan kud egkakeen ka abu, wey nasewuhan e te luwe ka eg-inumen ku, 
uya su nalangetan ka wey nabelu ka keddiey, su inggenat a nikeykew wey imbantulang a nikeykew. 
Nekeiling ad te mig-ugpe diye te marusilem; egkalanes ad iling te hilamunen. 
Piru sikeykew, he Magbebaye, eghari ka te ware egtamanan; egkatantanuran ka ngaran nu te langun ne kabuhalan. 
Miggingume e ka timpu ne igkeyid‑u nu ka Hirusalim, su eleg de iya ne egbulihan e sika, su sikan en iya ka eleg ne timpu. 
Su igkannuhun te me suluhuanen nu ka me batu diye, wey igkalulunu dan ka me alinepung dutu. 
Igkaaldek te me nasud ka ngaran te Magbebaye. Igkaalati te me Hari ka katelesan din. 
Su igpasasindeg ded te Magbebaye ka Hirusalim, igpapitew rin ka katelesan din. 
Egpamminehen din ka peg-ampu te egkaayu-ayu, ne igbehey rin iya ka egbuyuen din. 
Keilangan ne igsulat seini eyew egpakanengneng ka seup ne kabuhalan, eyew seeye se eglesut pad egpakarayan te Magbebaye keureme. 
Su migpamantew sikandin puun te ugpaan din ne matulus, impantew rin ka tane puun te langit. 
Impammineg din seeye se egdeg-uy ne me pinirisu, wey eyew igpaleke seeye se newukuman ne eggimatayan. 
Ne igpanengneng dan diye te Siyun, ka ngaran te Magbebaye, wey egdayanen dan sikandin diye te Hirusalim, 
ke eglibulung ka me etew te minsan hendei ne me migharian, eyew egsimba te Magbebaye. 
Impamahuya a nikandin te egkankanakan e pad, malepet de ka umul ku ne imbehey rin keddi. 
Ne migkahi a, “He Manama ku, kene e pa ubag kua nikeykew, te kene e pad egkabuyag. Magbebaye, neuyag ka te ware egtamanan. 
Te dengan ne timpu, intumpi nu ka pabunsuran te kalibutan, wey intekul nu ka langit. 
Egkaawe mule seini piru sikeykew, ware egtamanan nu. Egpekeiling de sikandan te me kumbale ne egkaleddak. Egpekeiling naan de sikandan te me kumbale ne egluungen nu, wey igdegpak wey egkatarin e. 
Piru kene ka mule egkabalbalawan, wey eg-ugpe ka te ware egtamanan. 
Ka me anak ney te me suluhuanen nu, ware igkabantali ran te egmanguugpe; egbulihan nu sikandan ne meupiya se peg-ugpe due te keykew.”