Salmu.
104.
Egdayanen te pusung ku ka Magbebaye, he Magbebaye ne Manama ku, amana ka ne maresen. Insaluub nu ka katelesan wey kabantug. 
Nabukusan ka te malayag ne nekeiling e te kumbale nu. Intekul nu ka langit iling te balungbalung. 
Ne intahu nu ka lantawan nu diye te ampew te weyig. Inggimu nu ne karwahi ka me gapun. Mig-untud ka ne egparuma-ruma re te kalamag. 
Egsuhuen nu ka kalamag ne egpangguhud te lalag nu. Talagbulig keykew ka me kilat wey me hapuy. 
Impasasindeg nu ka kalibutan ne maresen se pabunsuran, su eyew kene iya egkawelwel. 
Impaampew rin ka dahat te tane, iling te manggad ne imbunbun. Nabunbunan te weyig ka me bubungan. 
Impanguleyian nu ka me weyig wey nangayun e. Imbalukanan nu sikandan wey nekeiling te migdagsang ne luhung ka laheng nu; te sikan de, migpariyu e sikandan. 
Impatulayas nu ka me weyig te me inged ne inteilan nu te egpabulusan, miglepew ka me bubungan wey migdalanahan ka me napu te weyig. 
Inteilan nu sikandan te eletanan ne kene dan egkaliyuwan, eyew kene dan e man‑e egkatimpaan ka tane. 
Impabaluy nu ne dakel ne weyig ka me sebseb, wey migdalanag seini te me bangalug. 
Egpanginum dutu ka me mahintalunan, uya, kenad egkammaraan ka mahintalunan ne asnu. 
Miglenged de iya dutu nangugpe ka me bayaku, wey egmangulahing sikandan diye te sugpang te kayu. 
Imbusbusan nu ka me bubungan te weyig puun te ugpaan nu diye te aw-awangan. Napenu ka inged te mateles ne nangimu nu. 
Impatubu nu ka me hilamunen, eyew due egkakeen te me ayam, wey impatubu nu ka me pinamula ne egtangguwen te etew, eyew due egkakeen ne egkaangey rin puun te tane. 
Miggimu ka te binu eyew meupiya ka eggeramen te etew. Miggimu ka te lana eyew egmateles ka ulaula te etew. Miggimu ka te egkakeen eyew egkabulung ka me etew. 
Egkatamtamanan egkaweyihi ka me kayu te Magbebaye, ne iyan ka me sidar diye te Libanun ne impamula rin. 
Migsesalag dutu te me kayu ka me bayaku. Migsesalag te malapung ne me kayu ka me kayametan. 
Ugpaan te me usa ka me bubungan; aputanan te me rabit ka me batuwen. 
Inggimu nu ka bulan eyew egtuus te me timpu; nateil e ke ken‑u eglineb ka aldew. 
Miggimu nu ka delem wey egngaranan e te marusilem, ne iyan ka pegpanleug-leug te me mahintalunan. 
Egginihel ka me anak te liyun ka egpandawi, eyew egpamitew te egkakeen ne igbehey te Manama. 
Ke egkapawe e, egpakabange e te indawi ran, ne eglibed e eglibulung diye te helesanan dan. 
Ne egbasuk e degma ka etew, wey egtrabahu taman te egkasagkup. 
He Magbebaye, dakel amana ka himu nu; matagseb ka wey neyimu nu ka langun, napenu de iya ka kalibutan te nangimu nu. 
Inggimu nu ka dahat ne dakel wey maluag, wey kene egkaseel ka me hinimu ne mig-ugpe kayi, dereisek wey derakel. 
Eggipanew diye te dahat ka me barku, wey eggalew-halew degma diye ka salimbaweng ne inggimu nu. 
Eg-iman-iman ka langun keykew, ne egbehayan nu te egkeilanganen dan ne egkakeen. 
Eglimuren dan ka langun ne igbehey nu; mesi egbekalen nud ka palad nu, egkabayangan e sikandan te langun ne meupiya. 
Emun ke egpariyu ka, ne amana sikandan egkabantalan, egpatey sikandan ke egbugtusen nu ka geyinawa ran; eglibed sikandan diye te tane ne impuunan dan. 
Impabayaan nu sikandan te Panisingan nu wey neuyag sikandan; imbalbalawan nu ka inged wey iyam e man‑e. 
Kene egkataman ka katelesan te Magbebaye; egkahale-gale ka Manama te nangimu rin. 
Egpangelkelen e ka tane iling te etew ne eg-umaan te liyas, su egkaalatan te mata nu ne egliting. Ne hendue te egkasilaban ka bubungan, su eg-eebel ka eggen-genan nu. 
Eg-ulahingan ku ka Magbebaye taman te egpatey a; egdayanen ku ka Manama ku taheed te neuyag e pad. 
Igkatelesi ubag perem nikandin ka pegpalemlem ku. Egkahale-gale a diye te Magbebaye. 
Eg-aween perem te inged ka me makasesale, wey egkahule e ka me etew ne mareet se hinimuwan. Egdayanen te pusung ku ka Magbebaye! Dayanen ka Magbebaye ne Manama!