Salmu.
105.
Pasalamati niyu ka Magbebaye, dawita niyu ka ngaran te Manama. Ipangguhud niyu te keet-etawan ka langun ne nangimu rin. 
Ulahing kew kandin, saye kew kandin, ipangguhud niyu ka kein-inuwan ne nangimu rin. 
Ipabantug niyu ka matulus ne ngaran din, seeye se egpamitew te Magbebaye, eggale-gale. 
Pamitawa niyu ka Magbebaye wey ka keseg din. Pabulus kew ne egsimba kandin. 
Tantanuri niyu layun ka kein-inuwan ne nangimu rin, kene niyu kalingawi ka me kein-inuwan wey ka peggukum din. 
Pammineg kew se me kabuhalan ni Abraham ne suluhuanen din, nengneng kew me anak ni Hakub ne in-alam din. 
Sikandin ka Magbebaye ne Manama ta, ka peggukum din egginguma te intiru ne kalibutan. 
Layun din egkasuman-suman ka kasabutan ne inggimu rin, kene din egkalingawan ka insaad din te masulug ne me kabuhalan. 
Miggimu sikandin te kasabutan duma ki Abraham, ne migpahunlibet ded man‑e sikandin ka migsesaad ki Isaak, 
wey impamalehetan din seini ne kasabutan diye ki Hakub. Inggimu rin seini ne ware egtamanan ne kasabutan. 
Migkahi ka Manama, “Igbehey ku keykew ka tane te Kanaan, sika ka keykew ne baad te igbehey ku ne karatuan.” 
Deisek pad dengan sikandan te mig-ugpe dutu, migtagtaheed de sikandan nangugpe. 
Egkalaag-laag pad dengan sikandan te me nasud, wey eggalin-halin eg-ugpe te minsan hendei ne me migharian. 
Ware din tuhuti ne egbaybayaran sikandan te minsan hentew, insaparan din ka me Hari ne egdereet kandan. 
Kahi rin te migsapad, “Kene niyu pasakiti ka in-alam ku ne me etew, kene niyu dereeti ka me prupita ku.” 
Te timpu ne migpeuyanan din te gulabung ka tane te Kanaan, wey indereetan din ka langun ne egkakeen, 
impewun‑a rin e mule si Husi diye. Si Husi ka imbelegye diye eyew eg-uripenen. 
Migkeddinaan ka me paa rin, wey imbaliehan sikandin te putew, 
taman te natuman e ka inlalag te Magbebaye. Migpamalehet ka lalag te Magbebaye ne malehet iya ka inlalag din. 
Impalekaan sikandin te Hari, impaawe sikandin te pangulu te me etew. 
Impepangulu rin sikandin te baley rin, impiyalan din sikandin te karatuan din. 
Sikandin ka egpangulu te me upisyal te Hari, wey egpanulu te me igbuyag. 
Nataman, miggendiyad te Ihiptu si Israil, wey mig-ugpe diye te tane ni Ham. 
Ne impabuhal-buhal te Magbebaye ka keet-etawan din. Inggimu rin sikandan ne maresen pad du te me kuntere dan. 
Ne impeehetan din te me etew ka keet-etawan din, ne impabaybayaran din ka me suluhuanen din. 
Ne insuhu din ka suluhuanen din ne si Muwisis, imparuma rin degma si Aarun ne in-alam din. 
Ne miggimu sikandan te masulug ne me kein-inuwan te Manama, wey miggimu sikandan te me palinneu diye te Ihiptu. 
Imparusilem te Manama ka Ihiptu wey ka intiru ne inged, piru imbalahad de te me etew ka inlalag din. 
Impabaluy rin ne langesa ka me weyig, ne nammatey e ka me ngalap te weyig. 
Migguli-huli ka me bakbak ne nanlepew te intiru ne inged, nekeempet ka me bakbak minsan diye te me sinabeng te Hari. 
Migsuhu ka Manama wey nanlepew ka susuluhi ne me langew, nekeempet de iya te nasud dan ka me lengew-lengew. 
Imbehayan din sikandan te apiyew wey kene ne uran, wey impakikilat din diye te inged dan. 
Impameled din ka me paras wey me iggira, wey indereetan din ka me kayu diye te ugpaan dan. 
Migsuhu ka Manama wey nanlepew ka me talangas, migguli-huli re iya ka me tileng ne migginguma. 
Ingkeen dan ka langun ne pinamula te tane dan, miggulunan dan ka me behas te pinamula ran. 
Miggimatayan din ka langun ne panganey ne me lukes, ka igkasalig ne mannekal te kabuhalan dan. 
Nataman, impaawe din ka me kabuhalan ni Israil, ne nanguyan te pelata wey bulawan. Warad iya mahuye ne etew ne nakasewug, te kabuhalan te me tribu ne kabuhalan ni Israil. 
Nahale-gale ka me matig-Ihiptu te nangawe e sikandan, su naalatan e sikandan te neula-ula ran. 
Imparalungan din sikandan te gapun te maaldew, wey inteng-awan din te hapuy te marusilem. 
Migbuyu sikandan te egkakeen, wey imbehayan din te puhu, wey innibulung din sikandan te egkakeen ne egpuun te langit. 
Imbutbutan din ka batu, wey migbusuwak ka weyig, migtulayas ka weyig iling te beuhan diye te disirtu. 
Nasuman-suman te Manama ka matulus ne saad din, diye te suluhuanen din ne si Abraham. 
Ne impaawe din ka keet-etawan din ne nahale-gale, inlekaan din sikandan se in-alam din ne nangulahing. 
Imbehayan din sikandan te tane te duma ne me etew, nakarawat sikandan te tane ne ware dan ikalasey. 
Inggimu rin seini eyew egtumanen dan ka me suhu din, wey eg-ikulen dan ka me balaud din. Dayanen ka Magbebaye ne Manama!