Salmu.
106.
Dayana niyu ka Magbebaye ne Manama! Pasalamati niyu sikandin su meupiya sikandin wey ware tamanan te geyinawa rin ne kene egkabalbalawan. 
Duen naa egpakapangguhud te kein-inuwan ne nangimu te Magbebaye? Duen naa eleg ne egpakarayan kandin? 
Keupianan te seeye se egtanud-tanud ne kene egpakaleig-leig te duma, wey layun eleg ka hinimuwan. 
Tantanuri a, he Magbebaye ke igkeyimmenawi nud ka keet-etawan nu. Bulihi a ke egluwasen nud e sikandan, 
eyew egkakita ku ka pegmatubung te me etew ne in-alam nu, wey egpakasawit a te kahalaan te keet-etawan nu, wey egkarayan a degma iling kandan te in-alam nu. 
Nakasale key red iling te me amey ney dengan, neelin key ne nekeyimu te mareet wey kene ne meupiya. 
Te diye pad ka me kaap-apuan ney te Ihiptu, imbalahad dan ka kein-inuwan ne immangimu nu. Nalingawan dan ka geyinawa nu ne kene egkabalbalawan, wey nasi sikandan migpakig-ehet keykew diye te ilis te Malalab ne Dahat. 
Piru inluwas nu sikandan eyew kene egkahuhud ka ngaran nu, wey eyew egkawangal-wangal ka geem nu. 
Imbanasalan nu ka Malalab ne Dahat ne egkammara, wey migmammare en iya seini. Ne impalapas nu sikandan diye te nammara ne elat te dahat, wey iling dan te nangipanew diye te inged ne kene egkeugpaan. 
Ne impangabangan din sikandan puun te me belad te eg-ehet kandan, wey inluwas din sikandan puun te geem te kuntere dan. 
Ne naalep ka langun ne me kuntere dan, wey warad iya nasame kandan. 
Purisu migpalintutuu sikandan te me lalag din, wey mig-ulahing sikandan ka migdayan kandin. 
Piru mahaan dan de nalingawi ka immangimu rin, wey ware migtahad te tambag din. 
Diye te disirtu, amane e sikandan egkeibeg te egkakeen, wey in-el-elehan dan ka Manama. 
Purisu imbehey rin kandan ka imbuyu dan, piru impeuyanan din degma sikandan te dalu ne egpakarereet. 
Diye te kampu ran, nasekel sikandan ki Muwisis, wey ki Aarun ka immatulus te Magbebaye ne Manama. 
Purisu naperi ka tane, wey neulug e si Datan, si Abiram wey ka me duma rin. 
Ne due hapuy ne nakasilab te me duma ran, wey nakatutung te me etew ne mareet se hinimuwan. 
Ne miggimu sikandan te turu ne baka diye te Hurib, wey migsimba sikandan te larawan. 
Inliwanan dan ka mabantug ne Manama ran, te larawan te turu ne baka ne egkeen te hilamunen. 
Nalingawan dan e ka Manama ran ne migluwas kandan, ka miggimu te me kein-inuwan diye te Ihiptu, 
wey te kein-inuwan ne himu diye te tane ni Ham, wey te makaliyas-liyas ne himu diye te Malalab ne Dahat. 
Sikan naa ka egdereetan e perem sikandan te Manama, piru si Muwisis ne in-alam din, mighangyu ne kenad igpabulus ka pegdereet kandan. 
Insamsamilian dan ka meupiya ne tane, su ware ma sikandan migpalintutuu te saad te Manama. 
Migsagsahukul sikandan diye te me balungbalung dan, wey ware dan tumana ka Magbebaye ne Manama. 
Purisu ingkayew te Manama ka belad din, wey migpahunlibet kandan ne egkahule sikandan diye te disirtu 
wey egkapatey ka me kabuhalan dan diye te me nasud, wey egmekegsuwey-suwey sikandan diye te duma ne tane. 
Migduma sikandan te pegsimba ki Baal te Piyur, wey migkeen te igmanubad diye te napatey. 
Impeyibelu dan ka Magbebaye ne Manama te mareet ne me himu ran, sikan naa ka impeuyanan sikandan te karereetan. 
Piru migsasindeg si Pinihas, wey inlegparan din ka nakasale, wey mig-engked e ka karereetan. 
In-isip ne meupiya ka inggimu ni Pinihas, te langun ne kabuhalan te ware egtamanan. 
Impeyibelu dan ka Magbebaye ne Manama diye te weyig te Miriba, wey ingkasakiti seeye ni Muwisis. 
Ne tenged te impasakitan dan si Muwisis, nakalalag sikandin te mareet. 
Ware dan gulaa ka keet-etawan te Kanaan, ne iyan perem insuhu te Magbebaye ne Manama kandan, 
wey nasi sikandan migsabeka te seini ne keet-etawan, wey miggimu te iling te inggimu ran. 
Migpamakey sikandan te me diyus-diyus te mahinged, ne iyan nakarereet kandan. 
Impanubad dan ka me anak dan ne lukes, wey ka me anak dan ne malitan diye te me busew. 
Impangimatayan dan ka me anak dan ne ware sale, wey impanubad dan diye te me diyus-diyus te Kanaanen, wey seeye ka nakalindit te tane. 
Migmalindit sikandan tenged te me himu ran, wey egpekeiling sikandan te malitan ne egpamelegye te lawa. 
Purisu nabelu ka Magbebaye ne Manama te keet-etawan din, wey ingkalangeti rin sikandan. 
Imbehey rin sikandan diye te duma ne me nasud, su eyew iyan egpangulu kandan ka kuntere dan. 
Inleig-leig sikandan te me kuntere dan, wey in-uripen eyew egbaybayaran. 
Masulug ne timpu ne impangabangan sikandan te Manama, piru nasi sikandan migpakig-ehet kandin, wey nareetan sikandan tenged te sale dan. 
Piru inlinga-linga rin ded ka keyirapan dan, wey impammineg din ded ka pegpabulig dan. 
Insuman-suman din ka kasabutan din kandan, wey nekegsendit sikandin tenged te geyinawa rin ne kene egkabalbalawan. 
Ne imbuutan din ka nakarakep kandan, ne egkeyimenawan kandan. 
Luwasa key, he Magbebaye ne Manama, wey angaya key puun te me nasud eyew egkalibulung key ne egpasalamat te matulus ne ngaran nu, wey eyew egpakarayan key keykew. 
Deyrayen te ware egtamanan ka Magbebaye ne Manama, ka Manama te Israil. Ka langun ne keet-etawan egkahi, “Malehet iya!” Dayanen ka Magbebaye ne Manama!