Salmu.
107.
Pasalamati niyu ka Magbebaye ne Manama, su meupiya sikandin; ware egtamanan te geyinawa rin ne kene egkabalbalawan. 
Lalag kew se inluwas te Magbebaye ne Manama. Pasalamat kew se impangabangan din te keyirapan. 
Inlibulung kew nikandin puun te mariyu ne me inged. In-angey kew nikandin puun te igsile, te iglineb, te igkakawanan wey igkahibang ne balabahan. 
Due me etew ne nanleleug diye te disirtu. Natarin sikandan wey ware nakatulitu te siyudad ne eg-ugpaan. 
Inggutasan sikandan wey nammaraan, egkengabigtawan e sikandan. 
Ne migpangananey sikandan taheed te egkabaybayaran, “Magbebaye, bulihi key!” Ne impangabangan din sikandan. 
Impanulud din sikandan te matul-id ne dalan, taman te nekeuma sikandan te siyudad ne eg-ugpaan dan. 
Eleg iya ne egpasalamatan dan ka Magbebaye ne Manama, tenged te geyinawa rin ne kene egkabalbalawan, wey te me mateles ne nangimu rin diye te keet-etawan. 
Impeinum din ka nammaraan, impeuralan din ka egmanggutasan. 
Due me etew ne nanguugpe diye te marusilem wey makaalat-halat ne prisuwan, nabaybayaran sikandan se ingkeddinaan. 
Neyitabu sika kandan su mig-apul sikandan te insuhu te Manama, inggubabe dan ka panulu te Amana ne Maresen ne Manama. 
Purisu impatamtamanan din sikandan baybayari te egpatrabahu. Nenapeled sikandan wey ware egpakabulig kandan. 
Ne dutu, migpangananey sikandan ka egkabaybayaran, “Magbebaye, bulihi key!” Ne impangabangan din e sikandan. 
Impaawe din sikandan diye te durusilemi ne prisuwan, impamugtus din ka imbaku kandan ne me keddina. 
Eleg iya ne egpasalamatan dan ka Magbebaye ne Manama, tenged te geyinawa rin ne kene egkabalbalawan, wey te me mateles ne nangimu rin diye te keet-etawan. 
Su impangguhus din ka me gumawan ne me burunsi, impanggepu din ka me elet ne me putew. 
Due me etew ne neungel puun te mareet ne me himu ran, wey mig-antus sikandan tenged te me sale dan. 
Kenad sikandan egkeibeg ne egkeen, deisek naan de ne egkabugtus e ka geyinawa ran. 
Migpangananey sikandan ka egkabaybayaran, “Magbebaye, bulihi key!” Ne impangabangan din sikandan. 
Ne inlalag din de wey neulian e sikandan. Inluwas din sikandan ka egmamitu-pitu naan de se geyinawa. 
Eleg iya ne egpasalamatan dan ka Magbebaye ne Manama, tenged te geyinawa rin ne kene egkabalbalawan, wey te me mateles ne nangimu rin te keet-etawan. 
Eleg iya ne eghalad sikandan ka egpasalamat, likes sikandin ne eg-ulahingan. 
Due me etew ne mig-untud te me barku, eyew egtrabahu diye te dahat. 
Nakita ran ka me himu te Magbebaye, ka me kein-inuwan ne nangimu rin diye te pused te dahat. 
Miglalag de sikandin wey migpangalamag e te manekal, wey migderakel e ka bunlud te dahat. 
Nenakaantug ka me barku ran diye te aw-awangan, wey egpakabugsu de maa diye te dahat. Sikan naa ka inliyas sikandan te mangune-kune, su makaliyas-liyas ka intamanan dan. 
Egpakatilistilis e sikandan iling te egkengewubug, wey kenad egkateu-teu ke nekey ka eggimuwen dan. 
Ne migpangananey sikandan ka egkabaybayaran, “Magbebaye, bulihi key!” Ne impangabangan din sikandan. 
Impasanggel rin ka manekal ne kalamag, wey insaparan din ka me bunlud. 
Ne nahale sikandan te migpeeneng-eneng e ka dahat, wey impanulud te Manama sikandan diye te igkeupii ran ne egtuhunan. 
Eleg iya ne egpasalamatan dan ka Magbebaye ne Manama, tenged te geyinawa rin ne kene egkabalbalawan, wey te me mateles ne nangimu rin te keet-etawan. 
Eleg iya ne egbantuhen dan sikandin diye te kalibulungan, wey egdayanen diye te tangkaan te me pangulu. 
Impeetiyan din ka me weyig wey migbaluy e ne disirtu, neyimu e ne makehal ne tane ka me sebseb. 
Impabaluy rin ne ware karuan ka meupiya ne tane, tenged te sale te me mahinged. 
Impabaluy ne lanew ka disirtu, wey inggimu rin ne beuhan ka makehal ne tane. 
Impeugpe din diye ka egmanggutasan, wey in-ay-ayaran dan ka siyudad ne eg-ugpaan dan. 
Migbasuk sikandan wey migpamula te me paras, ne mig-uma te dakel ne behas. 
Impanalanginan din sikandan sikan naa ka nabuhal-buhal sikandan, wey ware din man‑e balahara ne egkasalinan ka me ayam dan. 
Emun ke egkaawaan e sikandan, egkeyilawan e, tenged te pegbayad-bayad, karereetan, wey kalaggew. 
Eglegparan din ka me pangulu te me inged, wey eglaahen din sikandan diye te kapangkalan ne ware egbayaan. 
Piru egpangabangan din ka egkaayu-ayu ne egbaybayaran, egtangguwen din sikandan se taltalaanak iling te kandin ne ayam. 
Egkakita te me matareng wey egkahale-gale sikandan, ne egpakapeeneng-eneng naan de ka mareet se hinimuwan. 
Seeye se matagseb, egtanud-tanud kayi. Egpalemlemen din ka geyinawa te Magbebaye ne Manama ne kene egkabalbalawan.