Salmu.
108.
Ka ulahingen ni Dabid. Kene egkabalbalawan ka pegsalig ku keykew, Manama! Eg-ulahingan ku sikeykew wey egdayanen ku te intiru ne pusung ku. 
Bukal-bukal kew alpa wey lira, egpukawen ku ka egpamalat-palat ne kaseleman. 
Egpasalamatan ku sikeykew Magbebaye, diye te duma ne me inged. Eg-ulahing a ka egdayan keykew, duma te me etew. 
Su egtimpa pad te langit ka geyinawa nu ne kene egkabalbalawan, wey egpakalepeng te gapun ka pegtuman nu te saad nu. 
Egtimpa pad te langit ka pegsaye keykew Manama. Egpekeempet te kalibutan ka keykew ne katelesan. 
Impangabangan nu seeye se indakelan nu te geyinawa, su maresen ka ne migluwas kandan, wey intabak a nikeykew. 
Migpahunlibet ka Manama te karesen din, “Egkarayan a. Egbaaren ku ka Sikim, egtengeen ku ka napu te Sukut. 
Sikeddi ka kamuney te Gilyad wey keddi ka Manasis. Iyan ku kalu ne putew ka Ipraim, iyan ku tuked ka Huda. 
Ka Muwab ka lu‑luanan ku. Ka Idum ka talagluung te sepatus ku. Egkatalu ku ka Pilistiya, wey egpanagyawan a te kahalaan.” 
Hentew‑a ka egpakapanulud keddi diye te maresen ne siyudad? Hentew‑a ka eg-uyan keddi diye te Idum? 
Ware key naan iya engkeri nikeykew, Manama? Ware kad migduma kanami te egpakiggira, Manama? 
Bulihi key puun te me kuntere ney, su ware karuan te pegbulig te etew. 
Ka Manama ka egbulig ne egpanalu key, egpandiekan din de ka me kuntere ney.