Salmu.
111.
Egdayanen ku ka Magbebaye! Egpasalamatan ku ka Magbebaye te keddi ne geyinawa, te timpu ne eglibulung key te me matareng. 
Kein-inuwan ka immangimu nu Magbebaye ne Manama; innengnengan seini te langun ne egkeeyaman te himu nu. 
Amana ne tetelesi wey kein-inuwan ka nangimu nu, wey ware egtamanan te katareng nu. 
Igpasuman-suman din kanta layun ka kein-inuwan ne nangimu rin; amana ne hiimenawen wey hiid‑uwen ka Magbebaye. 
Egbehayan din te egkakeen seeye se egtahud kandin; kene din iya eglingawan ka kasabutan din minsan ken‑u. 
Impapitew rin te keet-etawan din ka kein-inuwan ne himu rin; imbehey rin kandan ka tane ne iyan kamuney ka duma ne nasud. 
Egkasalihan ka nangimu rin wey kene ne mareet; egkapalintutuuwan iya ka langun ne suhu din. 
Kene egkaawe seini te minsan ken‑u, wey inggimu rin seini duma te pegkamatinumanen wey pegkamatareng. 
Inluwas din ka kandin ne keet-etawan; miggimu sikandin te kasabutan kandan te ware egtamanan. Matulus wey maresen ka ngaran din. 
Ka pegtahud te Magbebaye ka egpuunan te katagseb; ka langun ne egtuman te me suhu din egmatagseb. Egdayanen sikandin te ware egtamanan.