Salmu.
121.
Ka ulahingen para te pegpatakereg diye te Hirusalim. Migleng‑ag a te me bubungan, wey mig-inse ke hendei egpuun ka egpangabang keddi. 
Iyan egpangabang keddi ka Magbebaye ne Manama, ne miggimu te langit wey te tane. 
Kene ka egbalaharen te Magbebaye ne Manama ne egpakarugsu, wey kene sikandin egliplipereng ka egtameng keykew. 
Malehet iya! Kene eglipereng ka talagtameng te Israil, wey kene egkaalineknek. 
Egtameng ka Magbebaye ne Manama keykew. Egsasindeg sikandin te igkakawanan nu eyew egkaralungan ka nikandin. 
Kene ka egkatutung te aldew, wey kene ka egkamenu te layag naa te bulan. 
Egpangabangan ka te Magbebaye ne Manama te langun ne karereetan, wey egtangguwen ka nikandin. 
Egtantanuran ka nikandin, minsan hendei ka eggendiye, kunteen ma wey te ware egtamanan.