Salmu.
128.
Ka ulahingen para te pegpatakereg diye te Hirusalim. Keupianan te langun ne due pegkaaldek te Magbebaye ne Manama, wey mig-ikul te igkeupii rin. 
Egpakakeen kew te impakannekalan niyu te egtrabahu, egpanalanginan kew wey egpakameupiya seini kaniyu. 
Egpekeiling ka asawa niyu te paras ne mabehas-behas due te baley niyu, wey egpekeiling te me ulibu ne sikan pad egtubu ka me anak niyu ne eglingut due te lamisa niyu. 
Sika ka panalangin ne egkarawat te etew ne due pegkaaldek te Magbebaye ne Manama. 
Egpanalanginan kew te Magbebaye ne Manama ne mig-ugpe te timplu rin diye te Siyun ne iyan ka siyudad te Hirusalim! Egkakita niyu ne egmatubung ka Hirusalim. 
Egpakakita kew pad perem te me apu niyu! Ka keupianan egduma te Israil.