Salmu.
135.
Dayana niyu ka Magbebaye ne Manama! Dayana niyu ka ngaran din, me suluhuanen te Magbebaye, 
sikaniyu se migpamakey due te timplu te Magbebaye, due te lama te timplu te Manama ta! 
Dayana niyu ka Magbebaye su meupiya sikandin; ulahingi niyu ka ngaran din su hiimenawen sikandin! 
In-alam din si Hakub; ka me kabuhalan ni Israil kandin iya. 
Nakataha a ne maresen ka Magbebaye ne Manama; amana pad ne maresen du te langun ne diyus-diyus. 
Eggimuwen te Magbebaye ka minsan nekey ne igkeupii rin, diye te langit wey kayi te kalibutan, diye te me dahat wey diye te diralem te me dahat. 
Sikandin ka migpalihawang te me gapun puun te keepusan ne baad te kalibutan, ka miggimu te kilat duma te uran, wey ka migpalihawang te kalamag puun te me baley te kalamag. 
Sikandin ka migpangimatey te panganey ne me lukes diye te Ihiptu, panganey ne anak te me etew wey me mananap. 
Ne diye te Ihiptu, miggimu sikandin te me palinneu wey me kein-inuwan, eyew eglegparan si Paraun wey ka langun ne suluhuanen din. 
Indereetan din ka masulug ne me nasud, wey impangimatayan din ka maddesen ne me Hari, 
iling ki Sihun ne Hari te me Amurihanen, ki Ug ne Hari te Basan, wey te langun ne Hari te Kanaan. 
Ne impepanunud din e ka tane dan te keet-etawan din ne me Israilita. 
He Magbebaye ne Manama, egpabulus-bulus ka ngaran nu taman te ware egtamanan, wey kene egkalingawan ka kabantug nu te langun ne kabuhalan. 
Egpamalehetan te Magbebaye ne ware sale te keet-etawan din; egkeyimenawan sikandin te me suluhuanen din. 
Pelata wey bulawan ka me diyus-diyus te duma ne me nasud; inggimu re seini te me etew. 
Due be‑be dan piru kene egpakalalag; due mata ran piru kene egpakakita. 
Due talinga ran piru kene egpakarineg; due irung dan piru kene egpakageheyinawa. 
Egpekeiling iya kandan ka langun ne etew, ne miggimu wey migsalig te me diyus-diyus dan. 
Dayana niyu ka Magbebaye ne Manama, he keet-etawan te Israil; dayana niyu sikandin, me kabuhalan ni Aarun! 
Dayana niyu ka Magbebaye, he kabuhalan ni Libi; dayana niyu sikandin, sikaniyu se migtahud wey migpamakey kandin! 
Dayana niyu ka Magbebaye diye te Siyun, diye te Hirusalim ne ugpaan din. Dayana niyu ka Magbebaye ne Manama!