Salmu.
137.
Ne migpaminnuu key diye te ilis te me weyig te Babilunya; migpaninehew key te nasuman-suman ney ka Hirusalim. 
Ne impananggat ney ka me salurey ney diye te sugpang te me kayu. 
Su diye, impeulahing key te migpandakep kanami; insuhu key nikandan ne eg-alumama kandan. Migkahi sikandan, “Ulahingi key te ulahingen meyitenged te Hirusalim!” 
Ne egmenuwen ney naa te eg-ulahing te ulahingen te Magbebaye ne Manama, kayi te lein ne nasud? 
Kenad perem egkateu ka belad ku, ke eglingawan ku sikeykew, he Hirusalim! 
Kena ad man‑e egpekeulahing, ke eglingawan kud sikeykew, wey ke kene kud sikeykew egsumsumanen ne dakel ne kahalaan ku! 
Sumsumana nu, he Magbebaye ne Manama, ka inggimu te me matig-Idum te timpu ne naahew te Babilunya ka Hirusalim. Migkahi sikandan, “Tamtamani niyud sika guhusa!” 
Egdereetan kew iya, keet-etawan te Babilunya! Egpanalanginan ka me etew ne egsuli kaniyu, tenged te inggimu niyu kanami. 
Egpanalanginan ka me etew ne egpangahew te me anak niyu ne egsusu pad, wey egpanlampes kandan diye te batu.