Salmu.
140.
Ka ulahingen ni Dabid para te pangulu te mangngulahing. Luwasa a, he Magbebaye ne Manama, puun te me etew ne mareet se hinimuwan; pangabangi a puun te mabbulut ne me etew. 
Mareet layun ka egsumsumanen dan; egsesamuk sikandan layun te me etew. 
Iling te malalas ne me uled ka me dile dan; iling te lalas te uled ka me lalag dan. 
Pangabangi a, he Magbebaye, puun te geem te me etew ne mareet se hinimuwan; luwasa a puun te mabbulut ne me etew, ne migsuman-suman ne egdereet keddiey. 
Migbebaled ka hambuhen ne me etew para keddiey; migsesahilut sikandan para keddiey, wey miggimu te paluwak diye te dalan eyew egsahad a. 
Migkahi a te Magbebaye, “Sikeykew ka Manama ku.” Pammineha nu ubag ka pegpangananey ku, he Magbebaye! 
He Magbebaye ne Manama ku, ka maresen ne talagpangabang ku, impangabangan a nikeykew te timpu te gubut. 
He Magbebaye, kene nu ibehey te me etew ne mareet se hinimuwan ka igkeupii ran; kene nu ipalampus ka me planu ran. 
Kene nu pepanaluwa ka me kuntere ku ne miglingut keddiey; eglibed ded perem kandan ka me bantak dan keddiey. 
Egkengeuluhan perem sikandan te me baha; egkengeulug perem sikandan te bitu, wey kenad egmakalihawang. 
Kene perem eglampus seeye se egpamayung te duma; egpanahap perem wey egkengareetan ka mabbulut ne me etew. 
Nakataha a ne egpangabang ka, he Magbebaye te egkengaayu-ayu, wey kene egkaleig-leig te peggukum ka ware egkeyimu. 
Egdayanen ka iya te matareng ne me etew, wey eg-ugpe sikandan duma keykew.