Salmu.
144.
Ka ulahingen ni Dabid. Egdayanen ka Magbebaye ne Manama ne aputanan ku. Imbasbas a nikandin ne egkateu ne egpakiggira; impanulu a nikandin ne egpakiggira. 
Ka Magbebaye ka igkasalig ku ne egpangabang keddi; sikandin ka aputanan wey talagluwas keddi; sikandin ka insalihan ku wey impasakup din keddi ka langun ne nasud. 
He Magbebaye, nekey bes ka etew, mania te amana nu sikandin egtantanuri? Nekey bes ka karuan te etew, mania te amana nu egsumsumana? 
Egkeiling de te eglihad ne kalamag ka umul te etew, wey ke alung naa ne mahaan de egkaawe. 
He Magbebaye, lukati nu ka langit wey pamaneug ka. Samsama nu ka me bubungan eyew egmangeebel seini. 
Pahetebi nu te kilat ka me bubungan eyew egkengatempag seini; ipatandeg nu ka me tunud nu eyew egmekegsuwey-suwey ka me kuntere ku. 
Tinawaa a nikeykew due te langit, wey batuna a puun te maralem ne weyig, ne iyan ka karereetan puun te me lapu. 
Me ubaten sikandan wey migmahunlibet ne miglalag kun sikandan te malehet. 
He Manama, eg-ulahingan ku sikeykew te iyam ne ulahingen; egdayanen ku sikeykew ne egbalesan te alpa ne egpangeliten. 
Sikeykew ka migpepanalu te me Hari, sikeykew ka migluwas ki Dabid ne suluhuanen nu puun te karereetan. 
Luwasa a puun te mabbulut ne me kuntere ku. Luwasa a puun te karereetan ne egpuun te me lapu ne me ubaten. Migmahunlibet sikandan ne miglalag kun sikandan te malehet. 
Ka me anak ney ne me kanakan pad, egmekeiling perem te me pinamula ne malambeg wey malig‑en. Ne ka me anak ney ne me mengebay, egmekeiling perem kateles te me sungkaleg te palasyu ne inggelian. 
Egkapenu perem te langun ne klasi te uma te me pinamula ka me lelapeng ney. Egkengabuhal perem te linibu ka me karniru ney ne diye te me unayan. 
Egkabuhal perem ka me baka ney wey kene egkengaawaan. Warad e perem egpanlusud wey egpandakep kanami, eyew warad e egpaninehew diye te me plasa tenged te kalaggew. 
Dakel ka keupianan te seeye se impanalanginan. Keupianan te seeye se migpamakey te Magbebaye ne Manama.