Lalahen.
4.
Me anak, pammineha niyu ka pegpanulu te amey niyu wey linglingaa niyu sika eyew egpakaangken kew te katuenan. 
Me meupiya ka impanulu ku kaniyu purisu kene niyu seini balahara. 
Te bate e pad, inggeyinawaan a te iney ku su sabsabeka ku man de te anak din. 
Impanulu a te amey ku te miggenendue, “Itines nu te pusung nu ka impanulu ku keykew, wey tumana nu ka me suhu ku eyew egmalayat ka umul nu. 
Pakannekal ka ne egpakaangken te katagseb wey pegsabut. Tantanuri nu wey ikula nu ka impanulu ku keykew. 
Dakeli nu te geyinawa ka katagseb wey kene nu engkeri wey egtantanuran ka nikandin, wey egpangabangan. 
Seini ka puunan te katagseb: pakannekal ka ne egmatagseb ka. Ne minsan nekey ka eggimuwen nu, pakannekal ka ne egkatimulan ka katagseb nu. 
Geyinawei nu ka katagseb wey kene nu seini lekei, wey igpabantug ka nikandin. 
Egpekeiling ka katagseb te tetelesi ne bulak ne insaluub te ulu ne egpakabehey keykew te kabantug.” 
Anak, pammineha nu wey tantanuri nu ka impanulu ku keykew eyew egmalayat ka umul nu. 
Impanulu ku sikeykew te katagseb wey te eleg ne peg-ugpe. 
Ke eggipanew ka, kene ka egkasaligkat, wey ke egpallahuy ka, kene ka egpakarugsu. 
Tantanuri nu ke nekey ka natuenan nu wey kene nu sika lekei su egpakabehey sika keykew te keuyahan. 
Kene ka ikul te maddeet ne me etew, wey kene ka ikul te egbayaan dan. 
Pakaddiyui nu sika wey kene ka bul‑ug parani. Inniyuhi nu sika wey laheteng ka hipanew. 
Kene sikandan egpakalipereng ke kene egpekeyimu te mareet, wey ke kene egpakarereet te duma. 
Ka kareet, iyan dan pegkeen, wey ka kabulut, iyan dan inumen. 
Ka dalan te matareng, egpekeiling te egkasi-si ne kaliwaswasan ne egkapahan-ganaran egmalayag taman te egpekeuntud e ka aldew. 
Ka peg-ugpe te mareet ne me etew egpekeiling te penpenengan ne delem; ne kene dan egkanengnengan ke nekey ka egpuunan te karereetan dan. 
Anak, tantanuri nu ka me lalag ku; pammineha nu ka me panulu ku. 
Tantanuri nu seini wey itines nu te pusung nu, 
su egpakamalayat seini te umul wey egpakameupiya te peglelawa te seeye se egpakasabut kayi. 
Labew te langun, bantayi nu ka pegsuman-suman nu, su ke nekey ka egsumsumanen nu, sika iya degma ka eggimuwen nu. 
Kene ka lalag wey pangasak te mareet. 
Layun ka tengteng diye te kewun‑aan nu; memetmeti nu ka egkapabulusan nu. 
Ikul ka te meupiya ne dalan eyew ware mareet ne egkeyitabu keykew. 
Kene ka suwey te egbayaan nu, wey alihu ka te mareet.