Lalahen.
10.
Seini ka me lalahen ni Sulumun: Ka anak ne matagseb, egpakapahale te amey wey iney rin, piru ka anak ne kene egtulik, egpakapalaggew kandan. 
Kene egpakameupiya keykew ka karatuan ne egkaangken nu pinaahi te limbung, piru egpakaluwas mule keykew ka pegkamatareng. 
Kene egtuhutan te Magbebaye ne Manama ne eggutasan ka me matareng, piru egbalabahan din ka igkeupii te maddeet ne etew. 
Egpakaayu-ayu ka pegpapepehul, piru egpakaratu ka pegkamabasuk. 
Ka kanakan ne eglilimud te egkakeen te tinggaani, matagseb, piru ka kanakan ne egliplipereng de, egpakapeyilew. 
Egpanalanginan te Magbebaye ka matareng ne etew, piru ka me lalag ne impanlalag te maddeet ne etew, iyan de egdereet kandan. 
Ke egpatey ka matareng ne etew, egkeyimu sikandin ne panalangin te duma, wey layun egkatanuri, piru mahaan de egkalingawi ka mareet ne etew. 
Ka matagseb ne etew, egdawat te me meupiya ne tambag. Piru egkahunaan ka egpangasak de due te ware karuan. 
Ka matareng ne etew, mariyu te karereetan, piru ka etew ne egpekeyimu te mareet, egkasapenan. 
Ka etew ne egpanungkilat ne mareet se tuyu, egpakabehey te kalaggew. Ne ka etew ne egpangasak de due te ware karuan egkahunaan. 
Ka lalag te matareng ne etew, egpekeiling te sebseb ne egpakabehey te umul, piru egpakarereet ka lalag te mareet ne etew. 
Egpekeyimu re te samuk ka pegkasundug, piru ka geyinawa, egpakapasaylu te langun ne seyyup. 
Ka etew ne due salabutan, eglalag-lalag ne due katagseb. Piru ka etew ne kene egtulik, eleg ne egdisiplineen wey egparusaan. 
Ka matagseb ne etew, egpakannekal ne egtimul te katagseb din, piru ka eglalahen te etew ne ungel, egpakarereet de. 
Egpakabulig te meyaman ka karatuan din, piru ka keyirapan te egkaayu-ayu iyan egpakarereet kandin. 
Ka bayad te matareng ne etew, iyan sika se malayat ne umul piru eglegparan ka mareet ne etew. 
Ka etew ne egpalintutuu ke egsaparan, egmalayat se umul, piru ka etew ne kene eg-angken te seyyup din, egkatarin-tarin iya. 
Ubaten ka etew ne eggeeles te langet, wey egkeungel ka etew ne egsesalupet. 
Ke egpanaweles ka eglalag, egkaseyyup ka iya, piru ke matagseb ka, peeneng-eneng ke re. 
Ka me lalag te matareng ne etew, egpekeiling te seleppi ne neelin ne pelata, piru ware karuan te suman-suman te maddeet ne etew. 
Ka me lalag te matareng ne etew, egpakabehey te keupianan te masulug ne etew. Piru egpatey ka egkengeungel su ware ma me salabutan dan. 
Egkaratu ka etew pinaahi re te panalangin te Magbebaye, wey kene ne pinaahi te peglasey-lasey te himu. 
Ka ungel ne etew, egkahale ne eggimu te mareet, piru ka etew ne meupiya se salabutan, iyan mule igkahale ka katagseb. 
Ke nekey ka igkaaldek te mareet ne etew, nasi egkeyitabu kandin, piru egkaangken mule te matareng ne etew ka igkeupii rin. 
Ke egginguma ka keyirapan ne iling te bagyu, egkeuyan ka mareet ne etew, piru kene mule egkamenu ka matareng ne etew. 
Iling te suka ne egpakapangingilu te ngipen wey ke ebel naa ne egpakapaluwe te mata, ka pehulen egpakabelu degma te seeye se egsuhu kandin. 
Ka etew ne due pegkaaldek te Magbebaye, egmalayat se umul. Piru mahaan de mule egpatey ka maddeet ne etew. 
Ka pegpallateng te me matareng ne etew, egpakabehey kandan te kahale, piru kene mule egginguma ka in-iman-iman te maddeet ne etew. 
Egpangabangan te Magbebaye ka ware sale, piru egdereetan din mule ka maddeet se hinimuwan. 
Ka matareng ne etew, kene egkaweil, piru ka mareet ne etew, kene egkaluhey kayi te tane. 
Ka me matareng ne etew, matagseb ne eglalag, piru egpakarereet mule ka eglalahen te mareet ne etew. 
Ka matareng ne etew, nakanengneng ke nekey ka eleg ne iglalag, piru ka mareet ne etew, iyan de nanengnengan ka maddeet ne me lalag.