Lalahen.
23.
Emun ke eglagpu ka te me pangulu ne egkeen, bantey ka te pegweil-weil nu. 
Ke malehed ka ne egkeen, tigkel ka te pegkeetew nu. 
Kene ka pabebalbal te mananam ne keenen ne igsendad din, su kema ke igsahilut din de sika keykew. 
Kene nu lasaya ka pegkeetew nu eyew re egkaratu ka. Sumsumana nu ke nekey ka meupiya, wey peeneng-eneng kad ka eglasey-lasey. 
Ka karatuan, egkaawe te senge-pele-pele de; hendue sika te banug ne eglayang diye te mariyu. 
Kene ka tuhen te egkeenen te etew ne leheren; kene ka keibeg minsan pad ke mananam ka egkeenen din, 
su migbalansi sikandin te heles de. Egkahi sikandin, “Na, pangeen ke ma,” piru kene egpuun te pusung din ka sika ne pegginggat din. 
Egkeileb nu ka ingkeen nu wey egkaraat de ka langun ne meupiya ne me lalag nu kandin. 
Kene ka pakiglalag te etew ne ungel su eglemetan din de ka eglalahen nu minsan matagseb ka. 
Kene nu halina ka tapey ne eletanan te tane; kene nu ahawi te tane ka me ilu, 
su maresen ka Talagpangabang kandan, wey egpangabangan din iya sikandan. 
Tantanuri nu ka langun ne impanulu keykew, wey tuliki nu ka me lalag meyitenged te katuenan. 
Kene ka duwa-ruwa ne egdisiplina te anak nu. Kene egpakapatey kandin ka lampes, 
ke kene, egpakaluwas nasi sika kandin puun te kamatayen. 
Anak, amana a egkahale ke egkeyimu ka ne matagseb; 
amana a egkahale ke eglalag ka ke nekey ka eleg. 
Kene ka keimma te me makasesale, ke kene, kaaldeki nu ka Magbebaye ne Manama te intiru ne umul nu. 
Su egginguma red keureme ka aldew ne egkatuman iya ka impallateng nu. 
Anak, pammineha nu ka me panulu ku keykew. Keilangan ne egmatagseb ka, eyew egpekeikul ka te eleg ne dalan. 
Kene ka duma-ruma te me talewubug wey te me bel-is 
su egpakaayu-ayu ka pegpewubug-hubug wey pegpabebel-is. Ke iyan nu re eggimuwen se eglipereng, kene egkaluhey ne iyan nu naan de igsaluub ka maddeet ne kumbale. 
Pammineha nu ka amey wey iney nu ne iyan migbehey keykew te umul, wey kene nu sikandan balahara ke egkabuyag e. 
Pakannekal ka ne egkaangken nu ka kamalehetan, katagseb, panulu, wey salabutan, wey kene nu sika isaliyu te minsan nekey. 
Amana egkahale ka amey te anak din ne matareng; egkahale-gale iya ka amey te anak din ne matagseb. 
Egkahale iya ka amey wey iney nu ke matareng ka wey ke matagseb ka, iyan naan pa iya ka iney nu ne mig-anak keykew. 
Anak, ayad-ayad ka pammineg keddi, wey ilingi a nikeykew. 
Ka malitan ne egpamelegye te lawa, egpakapasahap keykew, iling te maralem ne bitu. 
Eggepas sikandin iling te takawen, wey egmasulug ka me lukes ne egpakalibug kandin wey egpakasale te me asawa ran. 
Hentew‑a ne etew ka eglungku, egpangehet, sahukulen, egkahumian, wey egkapalian te ware egpuunan wey layun egmalalab se mata? 
Sika iya se etew ne talewubug, wey egkeupian ne eggeram te nakalkalasi ne binu. 
Kene ka keibeg te malalab wey mananam ne binu ne egsilak diye te ubab, 
su emun ke egkeinum nud e sika, egkaheram nud e ne hendue te nakahatan ka te uled ne eggilu. 
Ne duen e egkengakita nu ne minsan nekey, wey kene kad e egpakasuman-suman amana, wey egpakapanlalag kad te maddeet. 
Peggeram-geram nu ne hendue te diye ka miggibat-hibat te barku ne diye te elat te dahat ne egkaan-antuwal. 
Ne egkahi ka, “Insumbag a nikandan piru wara a nasakiti, inlampesan a piru ware ku naheram. Ken‑u e bu pad egpekeyimata? Egkeupian a ne eg-inum e man‑e.”