Lalahen.
26.
Emun ke kene eggayul ne eg-uran te isnu te timpu te gulabung wey ke eg-uran naa te timpu te tinggaani, kene degma ne eleg ne egbantuhen ka ungel ne etew. 
Kene ka egkeutengan te dilus ke ware sale nu; egpekeiling te eglayang ne bayaku ne eglihad de wey kene eglatun. 
Keilangan ne eglampesan ka kudde, wey egkakangan ka asnu eyew egparuma-ruma. Ne iling naan ded degma ka ungel, keilangan ne eglampesan eyew egpalintutuu. 
Kene nu tabaka ka egmanlalahen te ungel ne etew eyew kene ka egpekeiling kandin. 
Piru senge-kakuwa ne meupiya degma ne egtabaken nu sikandin eyew egkanengnengan din ne kene bes sikandin ne matagseb iling te insuman-suman din. 
Ka etew ne egpanaha te ungel ne etew, egpekeiling de te intempug din ka paa rin, wey migpamitew re sikandin te samuk. 
Ware karuan te me lalahen te ungel, egpekeiling seini te me paa te pungku ne kene egpakabulig. 
Kalalungan de ka egdeyrey te etew ne ungel, iling te etew ne nasi igbagkes ka batu te pintik. 
Egpakapasakit ka me lalahen te ungel ne etew, iling te duhiyen ne kayu ne igwelwelewes te etew ne egkewubug. 
Ka etew ne egpatrabahu te ungel ne etew ne eglihad de wey ke talewubug naa, egpekeiling te talagpane ne egpanaweles de due egpamane. 
Ka etew ne eglibed-libed eggimu te keungelan, egpekeiling te asu ne egkeen te ileb din. 
Duen pad egkapallateng te etew ne subla ne ungel, du te etew ne migsuman-suman ne subla sikandin ne matagseb. 
Ka pehulen ne etew, eg-uugpe de te baley wey egkahi, “Duen ma nahud liyun dutu te dalan.” 
Ka pehulen ne etew, egbalbalikid de diye te hibatanan din iling te lekeb ne saliet malukati ne malekebi re man‑e. 
Due me etew ne subla ne pehulen, su minsan ka pegsungit naan de te keenen dan, kene dan egkeyimu. 
Ka pehulen ne etew, migsuman-suman ne matagseb pad sikandin du te pitu ne etew ne memeupiya ne egpanabak. 
Ka etew ne eg-amung-amung te apulan te duma egpekeiling te etew ne egdakep te eglihad ne asu ne diye eggen-geni te talinga. 
Ka etew ne eglilimbung te duma rin, wey egkatagtaheed egkahi sikandin te kawalian din de seeye, egpekeiling sikandin te egbusawen ne eggalew-halew egpane te tunud ne egpakapatey. 
Ke ware undul, egkeebukan ka hapuy; ke ware salupet, egkasanggel degma ka apulan. 
Ka usig ne etew, iyan egpuunan te apulan, iling te museng ne egpakabebaha, wey kayu ne egpakalegleg te hapuy. 
Ka peg-iran-iran, egpekeiling te mananam amana ne egkakeen ne amana ne meupiya ne eg-abelengen. 
Emun ke inggeles nu ka mareet ne suman-suman nu pinaahi te mateles ne me lalag egpekeiling ka te pelata ne impakepkep te bratu ne kuren ne inggimu puun te tane. 
Egkaayun ne iggeles te etew ka kabelu din pinaahi te meupiya ne me lalag din, piru eglimbungan ke bes de nikandin. 
Minsan meupiya ka me lalag din, kene ka palintutuu kandin, su napenu te malindit ka suman-suman din. 
Minsan ke iggeles din ka pegdumut din, piru egkakita te langun ka mareet ne hinimuwan din. 
Ka etew ne eglulungag te tane eyew egkeuluhan te duma, iyan nasi egkeulug; ka eglilid te batu diye te duma rin, iyan nasi egkaliliran. 
Ka ubaten ne etew, egkeepes iya te etew ne in-ubatan din.