Lalahen.
28.
Ka mareet ne etew, egpallahuy re due minsan ware eglupug kandin, piru ka matareng ne etew, kene mule egkaaldek iling te liyun. 
Emun ke egpakasale ka sabeka ne nasud, layun de seini egliwan te me pangulu. Piru egmaresen seini wey egpakapabulus ke me matagseb wey ke due me katuenan te me pangulu. 
Ka pangulu ne egleig-leig te egkaayu-ayu ne etew, egpekeiling te makeseg ne uran ne egpakarereet te eggaaniyen. 
Emun ke kene ka egtuman te Balaud, migpasabut ne miglapig ka te me maddeet ne etew. Piru ke egtuman ka kayi, migpasabut ne migpakigkuntere ka kandan. 
Ka maddeet ne etew, ware nakasabut te eleg ne peggukum, piru ka migtuman te igkeupii te Manama, nakasabut-sabut mule kayi. 
Meupiya pad ka etew ne egkaayu-ayu piru egkasalihan, du te etew ne meyaman piru kene egkasalihan. 
Ka anak ne egtuman te Balaud, matagseb naa. Piru ka anak ne egduma-ruma te me lalung ne etew, egpakapeyilew te amey wey iney rin. 
Emun ke egkaratu ka pinaahi te pegpatubu nu te seleppi nu, egpekeendiye ka karatuan nu te me etew ne matumpis te egkengaayu-ayu. 
Emun ke kene ka egtuman te me balaud, egkeepes ka Manama minsan te me peg-ampu nu. 
Emun ke egginalihen nu ka matareng ne etew eyew egpakasale, sikeykew red mismu ka egsahad te bitu ne inggimu nu. Piru due keupianan nu ke ware igkarew‑ey keykew. 
Ka meyaman, layun egsuman-suman ne matagseb sikandin, piru ka egkaayu-ayu ne etew ne matagseb, eg-ugsi-ugsi mule ke matagseb naan iya ka meyaman. 
Egkahale ka langun ke iyan egkeyimu ne pangulu ka me matareng ne etew, piru ke iyan egkeyimu ne pangulu ka maddeet ne etew, egpangeles ka keet-etawan. 
Kene ka iya egmatubung ke egbunbunan nu ka me sale nu, piru ke eg-angkenen nu seini diye te Manama wey eg-engkeran nu, egkeyimenawan keykew ka Manama. 
Due keupianan te etew ne layun egkaaldek te Magbebaye ne Manama. Piru ka etew ne makehal se pusung, egpekeendiye iya te karereetan. 
Ka pangulu ne egdeeg-deeg te egkengaayu-ayu, egpekeiling te liyun ne egginihel wey ke usu naa ne egpamitew te egpammueren. 
Ka pangulu ne kene ne matagseb, amana ne bubuluti wey egleig-leig. Piru ka etew ne kene egkeupian ne egkaratu pinaahi te mareet ne himu, egpakaangken te malayat ne umul. 
Ka etew ne nakapatey te etew, nekeiling de te miglulungag e sikandin te lebeng din, purisu balahara nu sikandin. 
Ka etew ne eg-ugpe ne ware igkarew‑ey, egkaluwas puun te karereetan, piru ka etew ne mareet se hinimuwan, egpekeendiye iya te karereetan. 
Ka mabasuk ne etew, egmanubla-subla se pegkeen, piru egkaayu-ayu ka etew ne egdaat-daat te timpu rin te peggimu te me ware karuan. 
Egpanalanginan te dakel ka etew ne egkasalihan, piru ka etew ne egkaana-ana ne egkaratu, kene egpakaalihu te legpad. 
Kene ne meupiya ne duen de eglapihan nu. Piru duen iya me etew ne eggimu te iling due eyew egpakakeeen de minsan deisek. 
Ka etew ne leheren, egkeupian ne mahaan egkaratu, piru ware sikandin nakanengneng ne nasi bes sikandin egkaayu-ayu. 
Meupiya pad ne egsaparan nu ka etew, su egpasalamatan ke red nikandin, du te egdeyrayen nu sikandin te ubat. 
Ka etew ne egpanakew diye te amey wey iney rin wey egsuman-suman ne kene ne sale seeye, duma red sikandin te me takawen. 
Ka leheren ne etew, iyan egpuunan te samuk, piru ka etew ne egsalig te Magbebaye, egmatubung mule. 
Ungel ka etew ne egsalig te pegkeetew rin, piru ka etew ne matagseb, egpakapariyu mule te karereetan. 
Ka etew ne matumpis te egkaayu-ayu, kene egkaawaan te me keilangan din. Piru ka etew ne leheren te egkaayu-ayu, egdirilusen te me etew. 
Emun ke iyan egkeyimu ne pangulu ka maddeet ne etew, egpangeles ka keet-etawan. Piru ke egkengaawe e sikandan te pegkapangulu ran, iyan e man‑e egmandu ka me matareng.