Ulahingen ni Sulumun.
1.
Ka amana ne meupiya te me ulahingen ni Sulumun. 
Patamtamani a nikeykew te egpangarek, su ka geyinawa nu meemis pad du te binu. 
Heemuti naan de iya ka peemut nu, wey ka ngaran nu egpekeiling keemut te imbusbus ne peemut. Purisu kene egkein-inuwan ne egkaalihan ka me mengebay keykew. 
Parani ka, gen-geni a wey egpallahuy ki. Uyana a diye te sinabeng nu, he Hari ku. Me mengebay te Hirusalim Egkahale key iya ke duen ka! Egkeupian key te geyinawa nu du te binu. Malitan Eleg de iya ne igkaalihi ka te me mengebay. 
He me mengebay te Hirusalim, meitem a iling te me balungbalung te Kidar, piru mateles a iling te me kurtina te palasyu ni Sulumun. 
Kena a lemeti nikaniyu tenged te meitem a, su natutung a te aldew. Nabelu keddi ka me suled ku ne me lukes wey impatrabahu a nikandan te parasan, sikan naa ka wara ad nakatugganul te pegkeetew ku. 
Guhuri a, inggeyinawaan ku, hendei nu pepanabtaba ka me karniru nu? Hendei nu igpeyimeley te meudtu? Guhuri a nikeykew eyew kena a egpekeiling te malitan ne migsisimbung ne natarin-tarin diye te duma nu ne me talagtameng te me karniru. 
Ke ware ka nakatulitu, he tetelesi te langun ne malitan, ikula nu re ka me kemes te me karniru ku ne nakatangke diye te balungbalung te me talagtameng, wey pepanabtaba nu ka me nati te kambing nu diye te marani. 
He inggeyinawaan ku, igpeiling ku sikeykew te beyan ne kudde ne igkeinniyat te lukesan ne me kudde ne egganuy te karwahi te Hari te Ihiptu. 
Mateles naan de iya ka beneng nu ne indayan-dayanan te me eritis! Meupiya naan de iya ka lieg nu ne indayan-dayanan te me balieg ne mahal ne me batu! 
Eggimuwan ney sikeykew te me eritis ne bulawan ne egdayan-dayanan te pelata. 
Nekeempet de iya ka keemut te peemut ku taheed te migsuladlad ka Hari te pinnuuwanan din. 
Meemut naan de iya ka pinalangge ku iling te senge-puyungut ne mira, taheed te migsulsuladlad sikandin te kumeng ku. 
Egpekeiling sikandin te senge-bagkes te meemut ne bulak ne egngaranan te hina ne diye te me parasan te In-Gidi. 
Mekein-inniyat ke naan de iya, inggeyinawaan ku; tetelesi ke naan de iya! Mateles ka mata nu iling kateles te me selepati! 
Tetelesi ka, pinalangge ku, mekein-inniyat ke naan de iya! Iyan ta hibatanan ka memeilem ne me hilamunen, 
wey iyan ta lilliyungan ka me sugpang te sidar, wey iyan ta atep ka mallapung ne dewun te ahuu.