Isayas.
6.
Te leg‑un ne migpatey e si Hari Usiyas, migpakita keddi ka Magbebaye ne Manama ne migpinnuu diye te titikangi ne trunu rin. Ne nekeempet te intiru ne timplu ka sidsid te kumbale din. 
Ne due me sirapim ne nanasindeg diye te ampew rin. Ka tagse sabeka kandan due hen‑em ne pakpak. Ne imbunbun dan te ulaula ran ka daruwa ne pakpak wey imbunbun dan te paa ran ka daruwa ne pakpak, wey inggamit dan te peglayang ka daruwa ne pakpak. 
Ne migmeum-umawey sikandan ne miggenendue, “Matulus, matulus, matulus ka Amana ne Maresen ne Magbebaye; neempet te katelesan din ka intiru ne kalibutan.” 
Ne nawelwel te kahulub te me laheng dan ka pabunsuranan te timplu, wey napenu te ebel ka timplu. 
Ne migkahi a, “Mekeyid‑u-hid‑u a! Egkareetan ad su malindit ma ka egmanlalahen ku wey mig-ugpa a duma te keet-etawan ne mallindit degma se egmanlalahen. Piru nakita ku ka Hari ne iyan ka Amana ne Maresen ne Magbebaye!” 
Ne miglayang ka sabeka te me sirapim peendini te keddi ne mig-uyan te insipit din ne baha puun te altar. 
Imparagket din seini te bibig ku wey migkahi sikandin, “Nakaragket e te bibig nu ka baha, purisu warad sale nu su impasaylu kad e.” 
Ne narineg ku ka laheng te Magbebaye ne Manama ne miggenendue, “Hentew naa ka egsuhuen ku wey hentew naa ka eggendiye para kanami?” Purisu migtabak a, “Sikeddi! Suhua a nikeykew.” 
Ne migkahi sikandin, “Hipanew ka wey kahii nu ka keet-etawan te Israil, ‘Minsan egmenuwen niyu te egpammineg, kene kew egpakasabut. Minsan egmenuwen niyu te egpitew, kene kew iya egpakakita.’ 
Pakehala nu ka me pusung te seini ne keet-etawan. Tumbenga nu wey butura nu sikandan eyew kenad e sikandan egpakarineg wey ke egpakakita naa, wey ke egpakasabut wey ke eglibed naa sikandan kayi te keddi wey egkeulian sikandan.” 
Ne mig-insa a, “He Magbebaye ne Manama, ken‑u naa seini egkataman?” Ne migtabak sikandin, “Taman te egkahuhus e ka me siyudad wey warad eg-ugpe, wey warad me etew diye te me baley wey egkareetan e ka katantanaan. 
Ne egdeldelen ku ka me etew diye te mariyu, wey eg-engkeran dan en iya ka tane dan. 
Ne minsan egkasame ka igkasapulu ne baad te me etew, egkareetan ded iya man‑e sikandan iling te napeled ne uk ne kayu wey ke tiribintu naa ne tued naan de se nasame.” Ka tued, migpahunsiling te egkasame ne pila-pila ne keet-etawan te Manama.