Isayas.
7.
Te timpu ne iyan mighari te Huda si Ahas ne anak ni Hutam, wey apu ni Usiyas, inlusuran te Hari te Sirya ne si Risin wey te Hari te Israil ne si Pika ne anak ni Rimalya ka Hirusalim piru ware dan natalu seini. 
Ne naaldek ka Hari te Huda te nanengnengan din ne migsabeka ka Israil wey ka Sirya. Ne ingkelkel ka keet-etawan din iling te kayu diye te puwalas ne nawelwel te kalamag. 
Ne ingkahiyan te Magbebaye ne Manama si Isayas, “Hipanew ka duma te anak nu ne si Sir-Hashub wey sinug-unga niyu si Ahas. Diye niyu sikandin egkasinug-ung te lenged te tubu te weyig ne egpeendiye te limuranan te weyig diye te dibabew. Marani seeye te dalan peendiye te pi‑pianan te egmamelegye te manggad. 
Kahii niyu si Ahas, ‘Pammineg ka. Kene ka kalaggew, kene ka kaaldek, wey kene ka pahuye-guye. Kene ka kaaldek tenged te subla ne langet ni Risin ne Hari te Sirya wey ni Hari Pika ne anak ni Rimalya. Egpekeiling de sikandan te pupud ne mig-eebel te neebukan e ka legleg te hapuy. 
Migplanu keykew te mareet ka Hari te Sirya duma te Hari te Israil ne migkahi, 
“Eglusuran ta ka Huda, egginaalreken ta, wey egsakupen tad seini, wey egpaharien ta diye ka anak ni Tabil.” ’” 
Ne impakahi pad man‑e te Magbebaye ne Manama si Isayas, “Piru kene eglampus ka planu ran, wey kene iya sika egkeyitabu. 
Su ka Sirya iling de kahuye te iney kayi ne siyudad ne iyan ka Damasku, wey ka Damasku iling de kahuye ki Hari Risin. Te hen‑em ne pulu wey lalimma (65) ne leg‑un, egkareetan e ka Israil wey kenad e egkeyimu ne nasud. 
Su ka Israil iling de kahuye te iney kayi ne siyudad ne iyan ka Samarya, wey ka pangulu te Samarya iling de kahuye ki Hari Pika. Ke kene kew egpalintutuu te iglalag ku, kene kew iya egkaluhey.” 
Ne impahuhuran e man‑e te Magbebaye ne Manama ki Isayas si Ahas te migkahi, 
“Buyu ka keddi te palinneu. Alam ka te palinneu minsan diye te kinariraleman te inged te me minatey wey ke diye naa te kinaribabawan te langit.” 
Piru migtabak si Ahas, “Kena a mule egbuyu. Kene ku eg-el-elehan ka Magbebaye ne Manama.” 
Ne migkahi si Isayas, “Pammineg kew se me kabuhalan ni Dabid! Kene naan pad ne eleg ka peg-ubil niyu te me etew? Eg-ubilen niyu naan pad man‑e ka Manama ku? 
Purisu ka Maname e mismu ka egbehey kaniyu te palinneu. Ne seini ka palinneu: egkaberes ka sabeka ne mengebay wey egpakaanak sikandin te lukes, wey egngaranan din ki, ‘Imanwil.’ 
Iyan din de egkeenen ka egkakeen ne inggimu puun te gatas, wey teneb de ka eg-inumen din ke egkateu e sikandin ne egsupak te mareet wey eg-alam te meupiya. 
Ne minsan te kene pad egginguma ka sika ne timpu, egkeengkeran e ka tane te seeye se daruwa ne Hari ne igkaaldek nu. 
“Sikeykew wey ka keet-etawan nu, lagkes ka langun ne kabuhalan te kaap-apuan nu, egpeuyanan te Magbebaye ne Manama te me keyirapan ne ware pad neyitabu bunsud te aldew ne migsuwey ka Israil te Huda. Igpaneem-neem seini te Magbebaye keykew pinaahi te Hari te Asirya. 
“Te sika kangkuwa ne aldew, egpamunsuwit ka Magbebaye ne Manama isip palinneu te pegginggat te me matig-Ihiptu ne egpekeiling te me langew ne egpuun te Weyig ne Nilu, wey te me matig-Asirya ne egpekeiling te me tameing. 
Ne egpanginguma sikandan langun wey diye sikandan egpangugpe te migbangalug ne dalama wey diye te me sulung diye te me batuwen. Ne egpangugpe degma sikandan diye te me duhiyen, wey diye te langun ne panabtaban. 
“Te seeye kangkuwa ne timpu, egdereetan te Magbebaye ne Manama ka inged niyu pinaahi te Hari te Asirya ne eg-umawen din puun diye te talipag te Weyig ne Iyupratis. Iyan egkeilingan te Hari te Asirya ka etew ne egpangahis te sumpe, bulbul, minsan ka bulbul te lawa te seeye se egpandakepen din eyew egpeyilawan din sikandan. 
“Te sika kangkuwa ne aldew, eg-uyag ka sabeka ne etew te sabeka ne nati ne baka wey daruwa ne kambing. 
Ne tenged te dakel ne gatas ne igpakabehey kayi, dakel degma ka egkakeen din. Ne iyan de egkeenen te langun ne etew ne nasame diye te Huda ka egkakeen ne inggimu puun te gatas wey teneb. 
“Te sika ne aldew, egkeempet e te me sapinit wey me balunseri ka parasan ne senge-libu (1,000) ne lebut ne egkentiddad te senge-libu (1,000) ne timman ne pelata. 
Tenged su neempet e seini te me sapinit wey me duhi, sikan naa ka egmanguyan ka me etew te piet wey me tunud ka egmanganup diye. 
Ne kene kew e egpekeendiye te langun ne bubungan ne layun de dengan egpikuwa, tenged su neempet e seini te me sapinit wey me balunseri. Ne egkeyimu e seini ne palayuranan te me baka wey egdi-diekan e seini te me karniru.”