Isayas.
9.
Piru warad e kalaggew te seeye se me etew ne neyirapan dengan. Te miglihad ne timpu, impeyilawan te Magbebaye ne Manama ka me etew diye te inged te me kabuhalan ni Sabulun wey Naptali. Piru te egginguma ne timpu, egbantuhen din ka me inged ne marani te dahat, ka tane ne talipag te Hurdan, wey ka Galiliya ne in-ugpaan te kene ne me Hudiyu. 
Ka keet-etawan ne miggipanew diye te karusileman, nakakite e te subla ne malayag. Ka seeye se me etew ne mig-ugpe diye te subla ne durusilemi ne inged, nalayahan e. 
He Magbebaye ne Manama, impamasulug nu ka mig-ugpe te nasud wey intimulan nu ka kahale dan. Miggale-gale sikandan due te tangkaan nu, iling te peggale-gale te me etew te tinggaani, wey te peggale-gale te me etew te timpu te pegpaba-baarey te nenaahew ran. 
Su egluwasen nu sikandan puun te migdeeg-deeg kandan wey eg-aween nu ka mabehat ne binabaan ne intiang dan. Ne inggepu nu ka me lampes te seeye se migdeeg-deeg kandan iling te inggimu nu te pegdereet nu te me sundalu te Midiyan. 
Ne egtutungen iling te kayu ne igtemeg ka langun ne sepatus ne insaluub te me sundalu te pegpakiggira, lagkes ka langun ne me kumbale te me sundalu ne neelin ne langesa. 
Due bate ne neetew para kanta. Imbehey te Magbebaye ne Manama kanta ka sabeka ne anak ne lukes ne egmandu te langun, wey egngaranan sikandin te “Kein-inuwan ne Talagtambag,” “Maresen ne Manama,” “Amey ne ware egtamanan,” wey “Talag-uyan te keupianan.” 
Ware katamanan te pegdakel te pegmandu din wey layun ne due keupianan. Eghari sikandin isip talagpanunud te migharian ni Dabid. Eglig‑enen din seini te ware egtamanan pinaahi te eleg ne peggukum wey katareng, puun kuntee taman te ware egtamanan. Eggimuwen iya seini te Amana ne Maresen ne Magbebaye. 
Ne migkahi ka Magbebaye ne Manama te egpalusuran din te me sundalu ka keet-etawan te Israil ne me kabuhalan langun ni Hakub. 
Egkanengnengan seini te langun ne me etew ne diye nangugpe te Ipraim wey diye te Samarya, ne migpaambug ne miggenendue, 
“Ke nenatempag ka me baley ney ne iyan inggamit ka me tisa, egbebaley key red man‑e ne iyan eggamiten ka insapsapan ne me batu. Nenatempug ka derakel ne me kayu ne sikumuru, piru egliwanan ney seini te me kayu ne sidar.” 
Purisu eglig‑enen te Magbebaye ne Manama ka me kuntere ni Risin eyew eglusud te Israil, egginalihen te Manama ka langun ne kuntere dan eyew eglusud kandan. 
Diye te igsile ka me matig-Sirya, wey diye te iglineb ka me matig-Pilistiya ne iling te mabbulut ne mananap ne andam ne egdereet te Israil. Piru minsan pad kayi langun, ware nabewu ka langet te Magbebaye ne Manama wey andam sikandin ne egparusa kandan. 
Piru ware mig-inniyug ka keet-etawan te Israil te me sale dan eyew eglibed e diye te Amana ne Maresen ne Magbebaye. Minsan inlegparan din sikandan, ware iya sikandan miglibed diye te kandin. 
Sikan naa ka eg-aween te Magbebaye ne Manama seeye se iyan egkeilingan se ulu ne iyan ka me pangulu te Israil, wey seeye se me etew ne iyan egkeilingan se me ikug. Egpangaween din te senge-kaaldew re seeye se iyan egkeilingan se mallayat ne lanisi, wey seeye se iyan egkeilingan se mallepet ne sedsed. 
Iyan ulu ka me igbuyag wey ka me talahuren ne me etew, wey iyan ikug ka me prupita ne ubaten. 
Su inlaag ma te me pangulu ka keet-etawan, wey nenallaag iya sikandan. 
Purisu ware nahale ka Magbebaye ne Manama te seeye se me bate-bate pad ne me etew ne mannekal ne egpakig-ehet, wey ware hid‑u rin te seeye se warad me amey wey me balu ne malitan. Su ware ma migpalintutuu te Manama ka langun wey makasesale, wey miglalag sikandan langun te keungelan. Sikan naa ka ware ded iya man‑e nabewu ka langet din, wey andam sikandin ne egparusa kandan. 
Su ka mareet ne hinimuwan, egpakasilab iling te hapuy wey egkaamin iya egkatutung kayi ka me sapinit wey me duhi. Egkasilaban kayi ka me kayu-kayu diye te puwalas, wey egparibabew ka kekepali ne ebel kayi. 
Tenged te langet te Amana ne Maresen ne Magbebaye, natutung ka intiru ne tane wey nekeiling te undul ka keet-etawan; ware sabeka ne egpangabang te suled din. 
Ne egpangahew sikandan te egkeenen dan minsan hendei, piru kene sikandan egkengabulung. Ne egkeenen dan pad iya minsan ka me anak dan. 
Migpeun-unayey migpeehetey ka keet-etawan te Manasis wey ka keet-etawan te Ipraim, wey migsabeke e man‑e sikandan ka miglusud te Huda. Minsan pad kayi langun ware ded iya man‑e nabewu ka langet te Magbebaye ne Manama wey andam iya sikandin ne egparusa kandan.