Isayas.
12.
Te sika ne aldew, eg-ulahing ka keet-etawan ne eggenendue, “Egdeyrayen ku sikeykew Magbebaye ne Manama! Minsan nabelu ka dengan keddi piru nabewu e, wey inliwang ad nikeykew kuntee. 
Sikeykew, Manama ka egluwas keddi; egsalig a keykew wey kena a egkaaldek. Sikeykew Magbebaye ka egbehey te geem wey kanekal, wey inluwas a nikeykew.” 
Ne egkahale ka keet-etawan ke egbulihan sikandan te Magbebaye, iling te seeye se namadmaraan ne egsakug te eg-inumen ne weyig. 
Te sika kangkuwa ne aldew, eg-ulahing ka keet-etawan ne egkahi, “Pasalamati niyu ka Magbebaye ne Manama! Pangananey kew kandin! Ipangguhud niyu te me nasud ka immangimu rin! Ipanengneng niyu ne labew te langun ka ngaran din! 
Ulahingi niyu te me pegdeyrey ka Magbebaye ne Manama tenged te kein-inuwan ne inggimu rin. Ipanengneng niyu seini te intiru ne kalibutan. 
Panguleyi kew wey ulahing kew te kahale, sikaniyu se nangugpe te Hirusalim tenged te neneyimu pinaahi te geem te matulus ne Manama te Israil ne due te taliware niyu.”