Isayas.
13.
Seini ka lalag te Magbebaye ne Manama ne igpanengneng diye ki Isayas ne anak ni Amus meyitenged te Babilunya: 
“Pasasindeg kew te bendila diye te puntul te bubungan ne ware me kayu. Ne kuleyi-i niyu ka me sundalu wey ikawey niyu ka belad niyu isip tuus eyew egpakalasud e sikandan te me gumawan te mabbantug ne me etew. 
Insuhu ku ka me sundalu ne in-alam ku eyew te pegdusa te me matig-Babilunya ne ingkalangeti ku; me hambuhen sikandan wey egkengahale-gale ne egpanalu. 
Pammineg kew! Due mahulub amana ne egpuun te me bubungan. Kahulub seini te susuluhi ne me etew ne egpuun te nalein-lein ne me nasud ne nasabeka ne miglibulung. Inlibulung te Amana ne Maresen ne Magbebaye ka me sundalu rin para te pegpakiggira. 
Diye sikandan egpuun te diriyui ne inged, diye te katamanan te langit. Eggamiten sikandan te Magbebaye eyew igpaneem-neem ka langet din. Egdereetan din ka intiru ne inged pinaahi kandan. 
Pandalawit kew su mahaan e ka aldew te Magbebaye, ka aldew ne igpaneem-neem e te Maresen ne Manama ka karereetan. 
Purisu, egkaawaan te keseg ka belad te tagse sabeka wey egkaawaan te kabulut ka langun ne keet-etawan, 
wey egkengaaldek sikandan. Egmakabalbaleey sikandan wey egkasaksakitan te egpangkusan dan iling te eggeramen te malitan ne egbaletikan. Egmasilsil-apey sikandan se neelin ne nalliyasan wey egmalalab ka me ulaula ran tenged te keyilew. 
Egginguma iya ka aldew te Magbebaye, ka makaaldek-haldek ne aldew duma te mangune-kune ne langet din eyew te pegdereet te kalibutan wey te me makasesale. 
Ne kenad e eglayag ka me punduk te me bituen. Ne egsile ka aldew ne ware kalayag, wey kenad degma eglayag ka bulan. 
Egdereetan ku ka kalibutan wey egdusaan ku ka maddeet ne me etew tenged te me sale dan. Eg-aween ku ka me hambuhen wey ka me mapegpeggasal. 
Pila-pila naan de ka me etew ne egkasame; iling naan de sikandan kareisek te neneelin ne bulawan te Upir. 
Sikeddi se Amana ne Maresen ne Magbebaye, egwelwelen ku ka me langit wey egkaantag ka kalibutan diye te natahuan kayi. Eggimuwen ku seini te timpu ne igpakita kud ka mangune-kune ne langet ku. 
Ne ka me lapu diye te Babilunya, egmakapallahuy peendiye te me nasud dan ne egpekeiling te usa ne egpanganupen wey ke karniru naa ne ware talagbantey. 
Ne seeye se egkarakep, eggimatayan pinaahi te kampilan. 
Ne diye de iya te tangkaan dan, egpanlupeta ka dereisek pad ne me anak dan. Ne egpanakawan ka me baley ran wey egpamehesen te eggilabet ka me asawa ran. 
Pammineg kew! Egpalusuran ku ka Babilunya te me matig-Midiyan ne amana egkeupian te kapanaluwan du te pelata wey ke bulawan naa. 
Egpangimatayan dan pinaahi te piet ka me kanakan. Ne kene egkeyid‑u sikandan te me bate wey minsan ka egsusu pad. 
Minsan subla ne mateles te langun ne migharian ka Babilunya wey keupianan wey bantug seini te keet-etawan diye, piru egdereetan ku seini iling te Suduma wey Gumura. 
Ne warad eg-ugpe diye te ware egtamanan. Ne warad e me talagtameng te me karniru ne egpasasindeg te balungbalung diye taheed te igmabulbuluku dan ka me karniru ran diye. 
Ne iyan e egmambulbuluku diye ka me mahintalunan ne me mananap wey egkapenu ka me baley te me mananap ne egmaneteul. Ne eg-ugpe e diye ka me ustrits wey diyad e egmangum-umbetut ka me leew ne kambing. 
Ne ka me mahintalunan, egmanlelalag e diye te matikang ne me baley wey diye te me palasyu te Babilunya. Mahaan e ka katamanan te Babilunya wey kenad e egkaluhey.”