Isayas.
14.
Piru igkeyid‑u red te Magbebaye ne Manama ka me matig-Israil wey eg-alamen din ded sikandan isip keet-etawan din. Ne egpeugpeen din ded sikandan diye te inged dan. Ne seeye se kene ne me Hudiyu ne egmangugpe diye te inged dan, egkasabeke e te me kabuhalan ni Israil. 
Ne egbulihan ka Israil te duma ne me nasud eyew egpakalibed sikandan diye te inged ne imbehey kandan te Magbebaye. Ne egpandakepen dan seeye se migmandakep dengan kandan wey egsakupen dan seeye se migbayad-bayad dengan kandan. Egpanguripenen dan seeye se egpamuun te duma ne me nasud. 
Me matig-Israil, te aldew ne egpeyimelayen kew te Magbebaye puun te me masakit, peg-antus, wey maggirap ne me himu ne impeyimu kaniyu, 
balbalaya niyu ka Hari te Babilunya. Ne seini ilalag niyu, “Nareetan e ka Hari ne talagdeeg-deeg wey nataman e ka pegpaambug din. 
In-awe e te Magbebaye ka geem te maddeet ne me pangulu 
ne egkengalanglangetan ne egdeeg-deeg te me etew, wey kene egpeeneng-eneng ne egbayad-bayad te duma ne me etew diye te lein ne me nasud. 
Ne egkataman, malinawen e ka intiru ne kalibutan wey egmangulahing e te kahale ka tagse sabeka. 
Ne miggale-gale ka me kayu ne sipris wey me sidar diye te Libanun tenged te neyitabu te Hari. Migkahi sikandan, ‘Warad e egpameled kanami su migpatey kad ma.’ 
“Ne ka inged te me minatey ne diye te diralem, migpangandam e te pegsinug-ung keykew Hari te Babilunya. Ne egkengapukew ka me gimukud te nenammatey e ne me Hari dengan wey me pangulu te me nasud. Egmanasindeg sikandan puun te me trunu ran eyew te peg-elit-elit keykew. 
Ne egkahiyan ka nikandan, ‘Kuntee, mahuye kad degma iling kanami. Nekeg-iling kid e. 
Ne kuntee, nakalebeng e duma keykew ka kabantug nu wey warad e dahing te alpa diye te palasyu nu. Ne iyan nud ulesen wey hagpi ka me liwati.’” 
“Sikeykew se Hari te Babilunya, egpekeiling ka dengan kalayag te Buntetale, piru pitew ke ma kuntee ke mamenu katikang ka neuluhan nu puun te langit! Te miglihad ne timpu, masulug ne nasud ka natalu nu piru kuntee natalu kad e degma. 
Migkahi ka te suman-suman nu, ‘Eggendiya a te langit, diye te dibabew te me bituen te Manama wey diye ku igtahu ka trunu ku. Egpinnuu a diye te mariyu ne inged diye te bubungan ne libulunganan diye te igkahibang ne balabahan. 
Eggendiya a te dibabew te me gapun wey eglepengan ku ka Amana ne Mabantug ne Manama.’ 
Piru neuyan ka diye te Siyul diye te kinariraleman te bitu. 
“Ne egmemetmetan ka te gimukud te me minatey wey egsuman-suman sikandan ke nekey ka neyitabu keykew. Ne egmein-inseey sikandan, ‘Hendue te seini ma mule ka etew ne ingkaliyasi te me etew diye te kalibutan tenged su ingkaaldek sikandin te me migharian? 
Hendue te sikandin ma ka migdereet te kalibutan ne egpekeiling e te disirtu, wey ka migdereet te me siyudad wey ka kenad iya egpalihawang te naddakep din?’ 
“Ka langun ne Hari te kalibutan, mabantug ne migpaleley-as diye te lebeng dan. 
Piru kene igpakalebeng ka lawa nu; igdegpak mule seini iling te sugpang te kayu ne ware karuan. Egkabunbunan ka lawa nu te me lawa te me sundalu ne nenamatey te gira, wey ig-ulug ka duma kandan diye te bitu ne batuwen iling te minatey ne egdi-diekan de. 
Kene ka iglebeng iling te duma ne Hari, su indereetan nu ma ka nasud nu wey impangimatayan nu ka keet-etawan nu. Ne ware egkasame te maddeet ne me kabuhalan nu. 
Bunsuri niyud te egpangimatey ka me anak din tenged te me sale te me kaap-apuan dan, su kema ke egmaresen pad sikandan. Kenad eleg ne egpakakamuney pad sikandan te tane, wey ke egpekeyimu naan pad te me siyudad kayi te intiru ne kalibutan.” 
Ne migkahi ka Amana ne Maresen ne Magbebaye, “Ne egpangaween kud iya ka langun-langun diye te Babilunya. Egpanguen ku ka me anak dan eyew warad e egkasame. 
Eggimuwen ku seini ne lasak-lasak wey iyan e ugpe kayi ka me ekang. Ne warad e egkasame minsan nekey iling te eglimasen ku ka langun-langun.” Kahi te Amana ne Maresen ne Magbebaye. 
Migsaad ka Amana ne Maresen ne Magbebaye, “Egkatuman iya ka planu ku wey ka igkeupii ku. 
Egdereetan ku ka me matig-Asirya ke diye sikandan te Israil. Egdi-diekan ku sikandan diye te me bubungan. Ne egpakaawe e ka keet-etawan ku puun te pegkeuripen dan te me matig-Asirya iling te pegpekas te yuggu diye te me lieg dan. 
Sika ka planu ku te intiru ne kalibutan wey sika ka legpad ne igpakita ku diye te langun ne nasud.” 
Tenged su sikan ma ka igkeupii te Amana ne Maresen ne Magbebaye, ware minsan hentew ne egpakabalabag due wey ke egpakapegnel naa te pegdusa rin. 
Seini ka lalag te Magbebaye ne Manama ne impanengneng din te leg‑un ne migpatey si Hari Ahas: 
Me matig-Pilistiya, kene kew gale-gale tenged su nahepu e ka iglampes kaniyu. Ke egpatey ka sabeka ne uled, due egsubal ne mabmabulut pad ne uled. Ne ka atelug te uled, egpigse te salimbaweng. 
Ne egpakeenen ku ka subla ne egkaayu-ayu ne etew, wey egpaliperengen ku ne malinawen. Piru eggimatayan ku pinaahi te gutas ka minsan hentew te etew nu ne egkasame. 
Pandalawit kew se me pangulu due te gumawan, wey paninehew kew se nangugpe te siyudad niyu! Kaaldek kew langun se me matig-Pilistiya! Su egkakita niyu diye te mariyu ka alinepung ne egpakaparibabew iling te ebel taheed te egpalinggumaan e ka me sundalu ne susuluhi ne egkengaana-ane en iya ne egpakiggira. 
Nekey naa ka igtabak ney te egpanuhuen te me Pilistihanen ne egpahuhuren ke egmanginguma sikandan? Egkahiyan ney sikandan, “Ka Magbebaye ne Manama iyan migpasasindeg te Hirusalim wey aputanan seini te mig-antus ne keet-etawan din.”