Isayas.
18.
Mekeyid‑u-hid‑u kew se mig-ugpe te me inged ne diye te talipag te me weyig te Itiyupiya ne due egkarineg ne dahing te me pakpak te me uled-uled. 
Ne puun te sika ne inged, due insuhu ne me talagpangguhud eyew te pegpepangabang te pegpakig-ehet te me kuntere. Diye sikandan migbaye te Weyig ne Nilu ne mig-untud te me balangey. Pangendiye kew e me talagpangguhud ne memeiyal ne egpangipanew! Uyan kew te guhuren diye te inged ne nabaad te me weyig, diye te me etew ne mallangkew wey mallurung se me laplap, maresen wey ingkaaldek te langun. 
Sikaniyu se langun ne nangugpe te kalibutan, pitawa niyu ke igparibabew e ka bendila diye te bubungan wey pammineha niyu ke igparahing e ka trumpita. 
Su seini ka ingkahi keddi te Magbebaye ne Manama, “Warad iya gulub ku te egpampamantew puun kayi te ugpaanan ku iling te keinit te aldew wey iling te demmug te timpu te tinggaani.” 
Su ka me kuntere egpekeiling te me paras, ne emun ke egkengatahak e ka me bulak wey mahaan e egkeyinuhi, egdereetan e sikandan te Manama iling te egpanengul te me sugpang. 
Ne egbalaharen naan de ka susuluhi ne sundalu ne nenammatey diye bubungan eyew egpangeenen e te me manuk-manuk wey leew ne me mananap te timpu te meinit wey ke timpu naa te maagsil. 
Piru egginguma ka timpu ne egpakarawat ka Amana ne Maresen ne Magbebaye te me dasag ne egpanguyanen te me etew ne mallangkew wey mallurung se me laplap—maresen sikandan wey igkengaaldek te langun. Egpuun sikandan te inged ne nabaad te me weyig. Ne eggendiye sikandan te Hirusalim ka inged ne diye egsimbaa ka Amana ne Maresen ne Magbebaye.