Isayas.
21.
Seini ka lalag te Magbebaye ne Manama ne igpanengneng meyitenged te inged ne ware mig-ugpe ne lenged te dahat: Ne egginguma ka karereetan ne egpekeiling te balisusu ne egbaye diye te inged te Nigib. Egpuun seini diye te disirtu, diye te makaliyas-liyas ne nasud. 
Ne due makaliyas-liyas ne impakita keddi te Magbebaye meyitenged te pegpangakal wey pegdereet. Sikaniyu se me matig-Ilam wey me matig-Midiyan, linguti niyu wey lusuri niyu ka Babilunya. Egpasanggelen e te Manama ka pegpaantus te Babilunya te duma ne me nasud. 
Tenged kayi, nakaheram a te subla ne masakit iling te eggeramen te malitan ne eglesutan. Ne natanengan a wey naaldek tenged te narineg ku wey nakita ku. 
Ne migmemasakit se geyinawa ku wey ingkelkel a te kaaldek. Ne egkeupian a ne egkahale te marusilem, piru ke egmarusilem e, nasi de iya ne egkabantalan a amana. 
Pitew kew, migpangandam e ka me pangulu te keenanan wey imbelatan dan e seini te manggad. Migmangekeen e sikandan wey migmangiinum. Ne sahuhune ne due migpanagyawan, “Kua niyu ka me kalasag niyu, me pangulu, pangandam kew te gira!” 
Ne ingkahiyan a te Magbebaye ne Manama, “Tahu ka te talagbantey te siyudad ne egpanugtul te egkakita rin. 
Ne emun ke egpakakita sikandin te me karwahi, migmangudde ne tigdaruwa, migmanguntud te asnu wey kamil, keilangan ne eg-ipaten din seini egpaay-ayari.” 
Ne migpanguleyi seeye se talagbantey, “Ahalen, migsesasindeg a kayi te matikang ne baley ne pantawanan te talagtameng te tagse aldew wey minsan te marusilem.” 
Ne kuntee, pitew kew! Due etew ne egpeendini ne mig-untud te karwahi ne ingganuy te daruwa ne kudde. Ingkahiyan a nikandin, “Nareetan e ka Babilunya wey nallupet e ka me diyus-diyus dan.” 
Me matig-Israil ne keet-etawan ku, indiekan kew iling te trigu piru impanengneng ku kuntee kaniyu ka meupiya ne guhuren ne narineg ku puun te Amana ne Maresen ne Magbebaye ne iyan ka Manama te Israil. 
Seini ka lalag te Magbebaye ne Manama ne igpanengneng diye te inged ne Idum: Ne due mig-umew keddi puun te inged ne Idum ne mig-inse, “Talagbantey, mananey naan pad egkapawe? Mamenu pad kaluhey?” 
Ne migtabak a, “Mahaan e egkapawe, piru egmarusilem ded man‑e eg-abey. Ne emun ke eg-inse ka eg-abey, libed ke re kangkuwa.” 
Seini ka lalag te Magbebaye ne Manama ne igpanengneng diye te Arabya: Sikaniyu se me matig-Didan ne migluyud ka egpangipanew, pamitew kew te egkeelungan niyu ne me kayu ke eg-aran te marusilem diye te disirtu te Arabya. 
Behayi niyu te weyig ka nammaraan. Ne sikaniyu se mahinged te Tima, behayi niyu te pegkeen ka me etew ne namallahuy puun te me inged dan. 
Migpamallahuy sikandan tenged te kampilan ne inggulabut e, wey tenged te piet ne in-uyamu e, wey tenged te mangune-kune ne gira. 
Ne migkahiyan a te Magbebaye ne Manama, “Sabeka ne leg‑un ka eglihad puun kuntee, egkataman e ka kabantug te Kidar. 
Ne pila-pila naan de ka egkasame ne mabbulut ne me talagpane diye te Kidar. Sikeddi ka Magbebaye ne Manama, ka Manama te Israil ka miglalag kayi.”