Isayas.
23.
Seini ka lalag te Magbebaye ne Manama ne igpanengneng diye te Tiru: Pandalawit kew se me nigusyanti ne nanguntud te me barku puun te Tarsis su nagguhus e ka me baley diye te Tiru, wey naddeetan e ka me sanggelanan te me barku. Ingguhud e sika kaniyu te migmananggel kew te Sipris. 
Peeneng-eneng kew se diye nangugpe te ilis te dahat wey sikaniyu se me nigusyanti diye te Sidun. Migmanlapas e te dahat ka me etew ne impanuhu niyu 
ne migmanguntud te me barku peendiye te masulug ne inged eyew te pegbeli wey pegbelegye te trigu ne mig-uma diye te ilis te Weyig ne Sihur wey te Weyig ne Nilu. Neyimu kew ne nigusyanti te me nasud. 
Egkeyilawan kad Sidun tenged su kene kad eg-angkenen te me dahat. Migkahi ka me dahat, “Ware anak ku. Ware intanggu ku ne me lukes ne bate wey ke impatulin naa ne me mengebay.” 
Egkalaggew amana ka me matig-Ihiptu ke egkarineg dan ka neyitabu te Tiru. 
Paninehew kew, sikaniyu se nangugpe diye te ilis te dahat! Pamallahuy kew diye te Tarsis. 
Kene kew egpakapalintutuu ne nakapaney ka siyudad te Tiru ne inged te kahale; seini ka inged ne migsuhu te masulug amana ne etew ne egpeendiyeen te maddiyu ne inged eyew te peg-uyag-uyag diye. 
Hentew ka migplanu ne egdereet te Tiru, ka siyudad ne due ka langun ne igkeupii te me etew? Ka me nigusyanti diye, me pangulu wey me talahuren te kalibutan. 
Ka Amana ne Maresen ne Magbebaye ka miggimu kayi eyew igpariralem ka me hambuhen wey ka langun ne mabbantug kayi te kalibutan. 
Ne sikaniyu se keet-etawan te Tarsis, egkeyimu niyud e ka igkeupii niyu kuntee iling te Weyig ne Nilu ne migtulayas ne ware egpekeelet. 
Ingkayew te Magbebaye ka belad din diye te dibabew te dahat wey impapitew rin ka geem din, wey indereetan din ka me migharian te kalibutan. Ne migsuhu sikandin ne egdereetan ka me aputanan ne inged diye te Kanaan. 
Ne migkahi ka Magbebaye ne Manama, “Sikaniyu se nangugpe te Sidun ne migpuunan te kalised, nataman e ka kahalaan niyu! Minsan pad egpariyu kew diye te Sipris, kene kew red iya man‑e egpekeyimeley.” 
Pitawa niyu ka tane te me matig-Babilunya. Warad e ka me mahinged diye. Inlusuran sikandan te me matig-Asirya wey immandereetan ka me matikang ne me baley ran wey ka me palasyu ran, wey neyimu e ne ugpaanan te me mahintalunan. 
Pandalawit kew se me nigusyanti ne nanguntud te me barku puun te Tarsis su nahuhus e ka siyudad ne aputanan niyu. 
Ne egkalingawan e ka Tiru te pitu ne pulu (70) ne leg‑un iling te kalayat te umul te Hari. Piru pegkeimpus due, igpeiling e ka Tiru te malitan ne egpamelegye te lawa ne egsusumpaliten te me etew te eg-ulahing: 
“Sikeykew se malitan ne egpamelegye te lawa, ne nalingawan e te langun, kuwa ka te alpa wey hip-hipanew ka ne eglingut-lingut te siyudad. Ne paayad-ayad ke naa ulahing te me ulahingen nu, eyew egkasuman-suman ke red te me etew.” 
Pegkeimpus te pitu ne pulu (70) ne leg‑un, igpalibed ded te Magbebaye ne Manama ka keet-etawan te Tiru te keugpe dan dengan wey eggimuwen dan ded ka me himu ran dengan, ka pegnigusyu diye te langun ne migharian te kalibutan iling te malitan ne egpamelegye te lawa. 
Ka egkaseleppi din igbehey diye te Magbebaye. Kene egkalimud te Tiru ka egkaseleppi din, ke kene, igkabehey seini diye te me etew ne migpamakey te Magbebaye eyew igbeli te dakel ne egkakeen wey te me mateles ne igmanaluub.