Isayas.
25.
He Magbebaye ne Manama, sikeykew ka Manama ku! Egbantuhen ku wey egdeyrayen ku ka ngaran nu, su kein-inuwan iya ka immangimu nu. Matinumanen ka iya ne egtuman te me planu nu dengan. 
Impangguhus nu ka me siyudad ne in-alad te matikang wey makepal ne batu. Impangguhus nu ka malig‑en ne me palasyu te me lapu, wey kenad e seini egpakasasindeg pad. 
Purisu egbantuhen ka te maddesen ne keet-etawan, wey igkaaldek ka te me nasud ne mabbulut se nangugpe. 
Aputanan ka te egkengaayu-ayu wey te ware egkeyimu te me timpu te kalised, wey helunganan ka te timpu te pegdaldaleet wey te peggulabung. Su ka pegdereet te mabbulut ne me etew, egpekeiling te makeseg ne bagyu ne egpakasuhat te alad ne batu, 
wey iling te keinit diye te mammara ne inged. Piru impapeeneng-eneng nu ma ka kahulub te mabbulut ne lapu, iling te naawe ne keinit su naringdingan te gapun. 
Egpangandam ka Amana ne Maresen ne Magbebaye te sahakeen kayi te Bubungan ne Siyun para te langun ne keet-etawan. Ne iyan din eg-andamen ka mannanam ne egkakeen wey subla ne meupiya ne binu. 
Te seini ne bubungan, eg-aween din ka kalaggew ne nakabunbun te langun ne etew te me nasud tenged te kamatayen. 
Ne eg-aween e te Magbebaye ne Manama ka kamatayen, wey egpunasen din ka me luwe te langun ne keet-etawan. Eg-aween din ka keyilew te keet-etawan din te intiru ne kalibutan. Sika ka ingkahi te Magbebaye. 
Ke egkeyitabu e seini, egkahi e ka keet-etawan, “Sikandin ka Manama ta! Migsalig ki kandin, wey inluwas ki nikandin. Sikandin ka Magbebaye ne insalihan ta. Eggale-gale ki su inluwas ki ma nikandin.” 
Ne egbulihan te Magbebaye ne Manama ka Bubungan ne Siyun, piru egdi-diekan din ka keet-etawan te Muwab diye mismu te inged dan iling te lahami diye te limuranan te tei. 
Ne migpakannekal sikandan ne egpakalihawang iling te eglumbuk ne igkamey-kamey ka me belad. Piru igtanled sikandan te Magbebaye ne Manama duma te langun ne kandan. 
Egdereetan din ka me matikang wey makepal ne batu ne alad te Muwab. Eglundusen din seini taman te egkatalagtag e diye te alinepung.