Isayas.
35.
Eggale-gale ka inged ne ware mig-ugpe wey egpamulak e ka me bulak diye te disirtu. 
Ne eg-ulahing wey egpanguleyi te pegkahale ka mammara ne inged ne kene egkeugpaan, wey masulug ka egpamulak. Ne egpekeiling e seini kateles te me Bubungan te Libanun, wey egpekeiling e keupiya te me kamet diye te Karmil wey diye te Siyarun. Ne ka tagse sabeka, egpakakita te katelesan te Magbebaye ne Manama ta, wey egpakakita te karesen wey geem din. 
Purisu, lig‑ena niyu ka me belad wey ka me buel ne warad keseg. 
Kahii niyu seeye se migmahuye, “Lig-ena niyu ka suman-suman niyu! Kene kew kaaldek! Egginguma ka Manama eyew egluwas kaniyu wey egsuli te me kuntere niyu.” 
Ne egpakakite e seeye se me butud, wey egpakarineg e seeye se kene egdineg. 
Ne egpekeumbetut e iling te usa seeye se me pungku, wey egpakapanguleyi e te kahale ka me ummew. Ne egtulayas ka me weyig diye te inged ne ware mig-ugpe, wey egtulayas e degma ka me beuhan diye te disirtu. 
Ne ka pantad ne iiniti, egkeyimu e ne linew, wey ka mammara ne tane, egkeyimu e ne sebseb. Ne ka me ugpaanan dengan te me leew ne asu ne iyan de egpanubu se me hilamunen, egpanubuan e te mallayat ne sedsed. 
Ne duen e kelesadda diye te mammara ne inged ne kene egkeugpaan wey egngaranan seini te “Matulus ne Kelesadda.” Ware makasesale wey me ungel ne egpakabaye diye. Ka seeye ne kelesadda para re te me etew ne mig-ikul te Manama. 
Ware me liyun wey ke minsan nekey naa ne mabbulut ne mananap ne egpakabaye diye. Iyan de egpakabaye diye seeye se me etew ne inluwas te Magbebaye. 
Seeye se inluwas te Magbebaye, eglibed diye te Hirusalim ne egmangulahing. Egkaawe e ka me peglungku dan wey pegkalaggew ran. Ne egkahale e sikandan te ware egtamanan.