Isayas.
38.
Te seeye ne timpu, migderalu si Isikiyas wey egpatey e perem sikandin. Ne inggendiyaan sikandin ni prupita Isayas ne anak ni Amus wey ingkahiyan, “Migkahi ka Magbebaye te upusi nud e himuwa ke nekey ka eggimuwen nu su kene kad e egkeulian te dalu nu, egpatey kad e.” 
Te pegkarineg ni Isikiyas dutu, diyad e sikandin migtangke te alad ne batu, wey mig-ampu te Magbebaye ne migkahi, 
“Sumsumana nu Magbebaye ne migmatinumanen a keykew te intiru ne pusung ku, wey inggimu ku ka meupiya diye te tangkaan nu.” Ne migpanaman-taman e migsinehew si Isikiyas. 
Ne impanengneng te Magbebaye si Isayas, 
“Libed ka diye ki Isikiyas wey kahii nu sikandin te migkahi a se Magbebaye ne Manama, ka Manama te kaapuan din ne si Dabid: narineg ku ka peg-ampu nu wey nakita ku ka me luwe nu. Egtimulan ku pad te sapulu wey lalimma (15) ne leg‑un ka umul nu. 
Egluwasen ku sikeykew wey ka seini ne siyudad puun te Hari te Asirya. Egpangabangan ku ka seini ne siyudad. 
Seini ka palinneu ne egtumanen ku seini se saad ku: 
Egpeisuesen ku ka alung te aldew te sapulu (10) ne ang-ang diye te haheran ne inggimu ni Ahas.” Ne natuman iya seeye. 
Seini ka insulat ni Isikiyas ne Hari te Huda te neulian e sikandin te dalu rin: 
Kahiyen ku ne egpatey ad se makeseg pad, wey egpalunggehaat diye te inged te me gimukud ne egngaranan te Hadis. 
Nakakahi a te kene kud e egkakita ka Magbebaye kayi te inged te me mannekal, wey kena ad e egpakakita te me mahinged te kalibutan. 
Mahaan e egkataman ka umul ku, iling te balungbalung te talagtameng te karniru ne eglulunen din ke eg-awe e sikandin te inged ne intaheeran din de te eg-upe. Kahiyen ku ne egkatempug e ka umul ku iling te manggad ne intempug te talagpaneyi te ulesen. Ne migtetahad a te maaldew wey marusilem ne egtempuhen nud ka umul ku. 
Ne migsinehew a te intiru ne marusilem, iling te impangebkeb te liyun ka me tul‑an ku. Ne migtetahad a te maaldew wey marusilem ne egtempuhen nud ka umul ku. 
Ne miglalag a ne egpekeiling e se laheng te kaluhey-luhey, wey migdeg-uy a ne egpekeiling e se laheng te selepati. Ne egpangalap-halap naan de ka pegtengteng ku te egleleng‑ag diye te langit. He Magbebaye, bulihi a nikeykew puun te seini ne keyirapan. 
Nekey naan e ka igpakalalag ku? Intabak a nikeykew wey sikeykew en iya ka migbawi keddi. Kena a egpakalipereng tenged te keyirapan ne neula-ula ku. 
Pinaahi te suhu nu Magbebaye ne Manama, nabehayan te umul ka me etew, wey nakaangken a degma te umul. Ne impalibed nu keddi ka meupiya ne peglelawa ku wey intuhutan e pad nikeykew ne egkeuyag. 
Malehet iya ne para te keupianan ku ka keyirapan ne nabayaan ku. Tenged te geyinawa nu, inluwas a nikeykew te karereetan wey impasaylu nu ka me sale ku. 
Su kene egpasalamat keykew wey egdeyrey ka diye te inged te me minatey, wey warad egpakapallateng te pegkamatinumanen nu. 
Ka me mannekal re iya ka egpakareyrey keykew iling te inggimu ku kuntee. Ne egpangguhuran te me amey ka me anak dan te pegkamatinumanen nu. 
Egluwasen a iya nikeykew Magbebaye ne Manama. Purisu, eg-ulahing key iya ne egbalesen te me instrumintu due te timplu nu te intiru ne umul ney. 
Ne ingkahiyan ni Isayas si Isikiyas, “Pakua nu ka me suluhuanen nu te indekdek ne iggira, eyew igpakepkep te buu nu, eyew egkeulian kad.” 
Ne mig-inse si Isikiyas, “Nekey ka palinneu ne egpekeendiya ad man‑e te timplu te Magbebaye?”