Isayas.
46.
Ne egpakariralem ka me diyus-diyus te Babilunya ne ensi Bil wey Nibu. Ne ka me larawan dan igdulan diye te asnu isip me dulan. Mabehat seini te seeye se nenabbeley ne me mananap. 
Nekeg-iling sikandan ne nakalangkeb wey kene dan egkaluwas ka mig-uyan kandan. Ne egpakalagkes de iya sikandan egkarakep. 
Pammineg kew keddi se me kabuhalan ni Hakub, wey sikaniyu se nenasame ne keet-etawan te Israil. Intanggu ku sikaniyu puun pad te peglesut niyu. 
Sikeddi ded ka egpabulus ne egtanggu kaniyu minsan ke egkengabuyag kew e wey ke eg-ubanen kew e. Inggimu ku sikaniyu wey egtamengan ku iya sikaniyu. Egbulihan ku sikaniyu wey egluwasen. 
Hentew naa ka egpeilingan niyu keddi? Duen naa egpekeiling keddi? 
Ne migkuwa te bulawan wey pelata ka duma ne me etew. Ne egsuul sikandan te mannayab eyew eggimuwen seini ne diyus-diyus. Egkataman, eg-usengul e sikandan te diyus-diyus wey egsimba. 
Egtiangen dan seini wey igtahu diye te tahuanan, wey diye de iya seini egpakatetahu. Kenad seini egpakaawe diye wey ke due egpangananey kayi, kene seini egtabak wey kene egpakaluwas kandan puun te keyirapan dan. 
Sikaniyu se me makasesale, kene niyu kalingawi seini; sumsumana niyu ke nekey ka inggimu ku. 
Sumsumana niyu seeye se impangimu ku dengan, su sikeddi de ka Manama wey warad lein. Sikeddi de ka Manama wey ware egpekeiling. 
Tapey kud impanengneng ke nekey‑a ka egginguma, wey intagne kud e ke nekey‑a ka egkeyitabu. Egkatuman iya ka planu ku, wey eggimuwen ku ka langun ne igkeupii ku. 
Eg-umew a te sabeka ne etew ne egpuun te igsile; iling sikandin te bayaku ne egpandawi, wey egtumanen din ka planu ku. Ke nekey ka implanu ku egtumanen ku iya seini. 
Pammineg kew keddi ka me makehal se me ulu, sikaniyu se migsuman-suman ne kene iya egpakapanalu. 
Te kene egkaluhey, egpepanaluwen kud e ka Hirusalim wey egluwasen kud e, wey egbantuhen kud e ka Israil.