Isayas.
48.
Pammineg kew se me kabuhalan ni Hakub ne ingngaranan te Israil, ne migpuun te me kabuhalan ni Huda. Migsaad kew te ngaran te Magbebaye ne Manama, ne Manama re te Israil ka Manama niyu. Piru kene ne malehet sika wey ke eleg naa. 
Su migpaambug kew ne mahinged kew te matulus ne siyudad, wey migkahi ne migsalig kew te Manama te Israil ne iyan ngaran se Amana ne Maresen ne Magbebaye. 
Ne ingkahiyan te Magbebaye ka Israil, “Ingkahi kud e dengan ke nekey ka egkeyitabu. Te timpu ne ware mig-iman-iman, sahuhune ne inggimu kud e. 
Nakataha a ne makehal ka me ulu niyu; iling kakehal te putew wey burunsi. 
Innangen kud e dengan kaniyu ke nekey ka egkeyitabu wey impanengneng kud e kaniyu ke nekey ka eggimuwen ku. Su kema ke egkahi kew ne ka me diyus-diyus niyu ne kayu wey putew ka miggimu kayi. 
“Narineg niyu ka impanagne ku wey nakita niyu iya seini, piru ware niyu ilaa ne sikeddi ka miggimu kayi. Puun kuntee, due iyam ne igpataha ku kaniyu ne ware ku pad inangen kaniyu wey ware niyu pad nanengnengi. 
Kunteen ku pad seini himuwa wey ware niyu pad seini narineg dengan su eyew kene kew egpakakahi te, ‘Uya, nakanengneng key e due!’ 
“Ware niyu narineg seini dengan, su nakanengneng a puun pad dengan ne ware kew migpammineg. Nakanengneng a ne talag-akal kew su puun pad te pegkabate niyu migribildi kew e. 
“Piru egkapegnel ku ka langet ku eyew egkabantug a. Egpeeneng-eneng a eyew kene kew egkareetan eyew egkareyrey a. 
Pammineg kew, eg-aween ku ka mareet due te kaniyu pinaahi te peg-antus ne egpekeiling te egtutungen piru ka egkasame kene egpekeiling te telek ne pelata. 
Para keddi seini se eggimuwen ku, su kena a egtuhut ne egkeyilawan a. Ware lein ne egkabantug, ke kene sikeddi de.” 
Ne migkahi ka Magbebaye ne Manama, “Pammineg kew keddi, sikaniyu se me matig-Israil ne in-alam ku. Sikeddi ka Manama, ka bunsuranan wey ka katamanan. 
Sikeddi iya ka migpabunsud te kalibutan wey ka miggimu te langit; egtuman sikandan ke egsuhuen ku. 
“Libulung kew langun wey pammineg kew. Hentew ne diyus-diyus ka migtagne ne eglusuran ka Babilunya te seeye se in-alam ku eyew te pegtuman te planu ku te seini ne nasud? Ware iya! 
Sikeddi ka migkahi wey ka mig-umew ki Siru. Egsuhuen ku sikandin wey eglampus sikandin te eggimuwen din. 
“Parani kew keddi wey pammineha niyu seini: Puun pad te an-anayan wara a miggeeles kaniyu. Ne duen a te neyitabu ka inlalag ku.” Ne kuntee ka Magbebaye ne Manama wey ka Panisingan din iyan migpeuyan keddi. 
Migkahi ka Magbebaye ne Manluluwas niyu, ka Matulus ne Manama te Israil, “Sikeddi ka Magbebaye niyu ka migpanulu te egpakameupiya kaniyu wey ka migpanulu te eleg ne dalan ne egbayaan niyu. 
Ne emun perem ke migtuman kew te insuhu ku kaniyu, egpekeiling perem te weyig ne egtulayas ka keupianan, wey egpekeiling perem te me bunlud ka katareng. 
Ne egpekeiling kasulug te pantad ka me anak niyu, wey egpekeiling te egketuen ne me pinamula ne kene egkaseel ka kabuhalan niyu. Ne kene perem sikandan egkareetan, wey ke egkaawe naa puun te tangkaan ku.” 
Awe kew e due te Babilunya. Pamallahuy kew e puun te me matig-Babilunya! Ipanengneng niyu te intiru ne kalibutan ne inluwas te Magbebaye ne Manama ka me suluhuanen din ne iyan ka keet-etawan te Israil. 
Ware sikandan nammareyi te timpu ne impanguluwan sikandan te Manama diye te disirtu su migpatulayas ma sikandin te weyig puun te batu. Impabekabeka rin ka batu wey migtulayas e ka weyig. 
“Ware keupianan te me etew ne maddeet se egpangimuwen.” Kahi te Magbebaye ne Manama.