Isayas.
52.
He Hirusalim, himata kad iya wey nekal-nekal ka! He Hirusalim, ka matulus ne siyudad, isaluub nud ka mateles ne kumbale nu, su kenad e egpakaseled ka kene ne me matig-Israil wey ka mallindit. 
He Hirusalim, sasindeg ka puun te alinepung wey pinnuu ka te trunu nu. Ne sikaniyu se naddakep ne keet-etawan te Hirusalim, hekara niyu ka keddina te pegkeuripen due te lieg niyu. 
Su seini ka ingkahi te Magbebaye ne Manama, “Imbehey ku sikaniyu eyew igpeuripen ne ware bayad, purisu eglekaten ku degma sikaniyu ne ware bayad. 
Miggendiye kew dengan te Ihiptu eyew diye eg-ugpe. Nataman, indeeg-deeg kew e te me matig-Asirya minsan ware egpuunan. 
Ne kuntee, nekey naan e ka neyitabu kaniyu? In-uripen kew diye te Babilunya ne ware bayari wey inlemetan kew te seeye se migmandu kaniyu. Ne egtapek e sikandan te aldew ka egbaley-baley te ngaran ku. 
Piru egginguma ka timpu ne egpekeila kew e keddi. Egkanengnengan niyud e ne sikeddi iya ka miglalag kaniyu te, seini e red.” 
Tetelesi amana ne egtengtengan ka talag-uyan te meupiya ne panugtulen ne miglampey te me bubungan eyew te pegpangguhud te meupiya ne guhuren ne iyan ka guhuren meyitenged te keupianan! Impanengneng din ka kaluwasan wey migkahi sikandin diye te Hirusalim, “Mighari e ka Manama niyu!” 
Pammineg kew! Migmanguleyi ka me talagbantey wey migmalegseey sikandan ka mig-ulahing te kahale su nakita ran iya ka peglibed te Magbebaye ne Manama diye te Hirusalim. 
Ulahing kew langun, sikaniyu se nahuhus ne me inged te Hirusalim, su egliwangen e te Magbebaye ne Manama ka keet-etawan din; egluwasen din e ka Hirusalim! 
Igpakita te Magbebaye ka matulus ne geem din diye te langun ne nasud; egluwasen din ka keet-etawan din, wey egkakita seini te langun ne etew. 
Sikaniyu se mig-uyan te me kasangkapan te timplu te Magbebaye ne Manama, pangawe kew e due te Babilunya. Kene kew samsam te in-isip ne malindit. Pangawe kew e due te Babilunya wey matulusa niyu ka pegkeetew niyu. 
Piru kene kew e ana-ana wey kene kew e pamallahuy su egpangabangan kew te Magbebaye. Ka Manama te Israil ka eggun‑a wey egpamewuri kaniyu. 
Migkahi ka Magbebaye, “Pammineg kew! Eglampus ka suluhuanen ku. Egkeila sikandin wey egmabantug. 
Ne masulug ka egkeinu-inu kandin su nareetan man e ka ulaula rin, wey hendue te kenad ne ulaula te etew. 
Egkeinu-inu e degma kandin ka me nasud. Ne warad lalahan te me Hari tenged su due egkakita ran ne ware pad nahuhud dengan wey due egkasabut dan ne ware pad narineg.”